5:1 แล้วได้มีข่าวลือต่อกันมาว่า มีการผิดประเวณีในหมู่พวกเจ้า แล้วการผิดประเวณีแนวนี้เถิงแม้นในพวกคนต่างซาติกะยังบ่มีเลย คือมีคนหนึ่งได้เอากันกับเมียของพ่อ

5:2 แล้วพวกเจ้ากะยังผยองอยู่ แทนที่สิเป็นทุกข์เป็นฮ้อนย้อนเรื่องนี้ เพื่อสิได้ตัดคนที่เฮ็ดผิดแนวนี้ออกจากหมู่พวกเจ้าไป

5:3 แม้นว่าโตข้อยบ่ได้อยู่กับพวกเจ้า แต่ใจของข้อยกะยังอยู่นำ ข้อยได้ตัดสินโทษคนที่ได้เฮ็ดผิดแนวฮั้นคือจั่งข้อยได้อยู่นำ

5:4 คือในนามขององค์พระเยซูคริสต์เจ้าของพวกเฮา บัดพวกเจ้ามาตุ้มโฮมกัน จิตวิญญาณของข้อยกะสิฮ่วมอยู่นำ พร้อมทั้งฤทธิ์อำนาจของพระเยซูคริสต์ พระผู้เป็นเจ้าของพวกเฮาฮั่น

5:5 เพื่อสิได้จัดการมอบซายคนฮั้นไว้ให้มารซาตานทำลายเนื้อหนังของเขาซะ เพื่อจิตวิญญาณของเขาสิได้พ้นโทษในมื้อขององค์พระเยซูเจ้าฮั้น

5:6 แล้วการที่พวกเจ้าอวดกันฮั้น มันบ่ดีจักหน่อยเลย พวกเจ้าบ่ฮู้บ้อว่า เซื้อฟูแค่หน่อยเดียวมันกะเฮ็ดให้แป้งขนมปังดิบฟูขึ้นเมิ้ดทั้งก้อน

5:7 จั่งซั้นล่ะ ให้จัดการซำระล้างเซื้อฟูเก่าฮั้นให้ออกไปเด้อ เพื่อพวกเจ้าสิได้เป็นแป้งขนมปังดิบก้อนใหม่ที่บ่มีเซื้อฟูเจือปนอยู่เลย ย้อนว่าพระคริสต์ ผู้เพิ่นเป็นแกะฮับบาปของเฮา เพิ่นได้ถืกสละเป็นเครื่องบูซาเพื่อคนเฮาแล้ว

5:8 จั่งซั้น ให้เฮามีการเลี้ยงฉลองมื้อฮั้น บ่แม่นฉลองด้วยเซื้อฟูเก่า หรือเจือปนด้วยเซื้อฟูของความซั่วซ้าเลวทราม แต่ด้วยขนมปังที่บ่มีเซื้อฟู คือความจริงใจกับสัจจะฮั้นล่ะ

5:9 ข้อยได้เขียนจดหมายเถิงพวกเจ้าแล้ว ว่าบ่ให้คบกับคนล่วงประเวณี

5:10 แต่ข้อยบ่ได้หมายเถิง ซาวโลกที่เป็นคนล่วงประเวณีฮั้น หรือคนโลภ คนขี้โกง ฮ่วมทั้งคนถือฮูปเคารพฮั้น บ่ซั้นพวกเจ้ากะสิต้องออกจากโลกนี้ไป กว่าสิหลีกเลี่ยงให้ได้

5:11 แต่บัดนี้ ข้อยเขียนมาบอกพวกเจ้าว่า คั่นมีผู้ใดที่เอิ้นว่าเป็นพี่น้องกัน แต่ยังล่วงประเวณี เป็นคนขี้โลภ เป็นคนถือฮูปเคารพ เป็นคนปากร้าย เป็นคนขี้เมา หรือเป็นคนขี้โกง กะอย่าคบกับคนแนวฮั้น แม้นแต่สิฮ่วมพากินนำกันกะอย่าเฮ็ดเลย

5:12 คือเฮาบ่มีหน้าที่ที่สิตัดสินคนภายนอกดอก แต่ว่าพวกเจ้ากะยังมีหน้าที่ตัดสินคนภายในบ่แม่นบ้อ

5:13 แต่ส่วนคนภายนอกฮั้น พระเจ้ากะสิตัดสินลงโทษเขาเอง แต่ว่าส่วนคนซั่วซ้าที่อยู่ในหมู่พวกเจ้าฮั้น กะให้จัดการให้ออกไปซะ