13:1 แม้นแต่ข้อยอาจสิเว้าภาษาอื่นๆ ของมนุษย์กะดี หรืออาจสิเว้าเป็นภาษาของเทวทูตกะอย่า แต่คั่นขาดความฮัก ข้อยกะกลายเป็นแค่ฆ้องหรือฉาบที่พวมส่งเสียงออกไปซื่อๆ

13:2 แล้วแม้นว่าข้อยอาจสิมีพรสวรรค์พิเศษฝ่ายวิญญาณในการบรรยายพระคำได้ กับอาจสามารถเข้าใจในความลึกลับทั้งเมิ้ด กับมีความฮู้ความเข้าใจในเมิ้ดคู่แนว แล้วแม้นว่าข้อยอาจมีความเซื่อเข้มแข็งอันใหญ่หลวงพอที่สิสั่งภูเขาให้โยกย้ายออกไปได้ แต่คั่นขาดความฮัก โตข้อยบ่มีสาระอีหยัง

13:3 แล้วแม้นว่าข้อยอาจสิมอบถวายทรัพย์สมบัติของโตเองให้เมิ้ดเพื่อบริจาคเลี้ยงคนยากจน กับแม้นว่าข้อยอาจสิยอมมอบโตเองให้เป็นเครื่องบูซาเผาไฟ แต่คั่นขาดความฮัก ข้อยกะบ่ได้กำไรอีหยัง

13:4 คือความฮักแบบของพระเจ้าฮั้นกะอดทนได้โดนแสนโดน กับความฮักแบบฮั้นกะมีแต่เมตตา ปรานี ความฮักแบบฮั้นบ่เคยอิจฉาใผ ความฮักแบบฮั้นบ่เคยอวดโต กับบ่เคยหยิ่งผยอง

13:5 ความฮักแบบฮั้นบ่เคยเฮ็ดในแนวที่บ่จบบ่งาม บ่เคยคึดเห็นแก่โตเองฝ่ายเดียว บ่เคยฉุนเฉียวฮ้ายง่าย บ่เคยมีความนึกคึดในทางซั่วเลย

13:6 ความฮักแบบฮั้นบ่เคยซื่นซมยินดีในความซั่วซ้าเลวทราม แต่ซื่นซมยินดีในความจริงอยู่ตลอด

13:7 ความฮักแบบฮั้นแบกเอาได้คู่อย่าง เซื่อส่วนดีในคู่อย่าง มีความหวังอันดีในคู่อย่าง ทนเอาได้ต่อคู่อย่าง

13:8 การฮักแพงแบบฮั้นบ่มีสูญสิ้นไป แต่คั่นแม้นว่าสิมีการบรรยายพระคำ มันกะสิสูญสิ้นไป คั่นแม้นว่าสิมีการเว้าภาษาอื่นๆ ฮั้น มันกะสิเมิ้ดสิ้นไป คั่นแม้นว่าสิมีความฮู้พิเศษ มันกะสิสาบสูญไปนำ

13:9 ด้วยว่า แนวใดที่เฮาเข้าใจฮั้นเฮาเข้าใจแค่ลางส่วน กับที่เฮาบรรยายพระคำของพระเจ้าฮั้นเฮาเปิดเผยแค่ลางส่วน

13:10 แต่บัดยามแนวที่สมบูรณ์ฮั้นได้มาฮอดแล้ว ในบัดฮั้นส่วนที่บ่ครบถ้วนกะสิจบลงไป

13:11 ตอนข้อยยังเป็นเด็ก ข้อยกะเว้าอย่างเด็กๆ เข้าใจอย่างเด็กๆ คึดหาเหตุผลอย่างเด็กๆ แต่บัดข้อยโตเป็นผู้ใหญ่แล้วข้อยกะเซาเฮ็ดแนวเป็นเด็กฮั้น

13:12 ด้วยว่า ในยามนี้พวกเฮาเห็นแค่มัวๆ ปานเบิ่งทางกระจกซื่อๆ แต่ในยามที่สิมาฮอดฮั้น พวกเฮาสิได้เห็นซัดเจนหน้าต่อหน้า คือในยามนี้ข้อยฮู้แค่ส่วนเดียว แต่ในยามที่สิมาฮั้น ข้อยกะสิฮู้จักเพิ่นอย่างที่เพิ่นได้ฮู้จักข้อย

13:13 แล้วในยามนี้กะยังมี ความเซื่อ ความหวัง กับความฮักดำรงอยู่ แล้วในสามแนวนี้ความฮักยิ่งใหญ่กว่าหมู่