5:1 แล้วส่วนพวกผู้ปกครองในพวกเจ้าฮั่น เฮาจั่งขอหนุนใจในฐานะว่าเฮาเองเป็นผู้ปกครองคือกัน แล้วได้เห็นความทุกข์ทรมานของพระคริสต์กับตาโตเอง กับมีส่วนฮ่วมในการฮับพระสิริของพระคริสต์ที่สิปรากฏในภายหน้า

5:2  จั่งซั้น ให้เลี้ยงฝูงแกะของพระเจ้าที่อยู่นำพวกเจ้าเด้อ ฮับใซ้ในการเบิ่งแยงเขา บ่แม่นด้วยการฝืนใจ แต่ด้วยเต็มใจ บ่แม่นด้วยการเห็นแก่ได้ แต่ด้วยการกระตือรือร้น

5:3 กับว่า บ่แม่นคือจั่งเป็นเจ้านายเหนือเขา ผู้ที่ฮับฝากไว้กับเจ้าฮั้น แต่เป็นแบบอย่างให้พวกเขาผู้เป็นฝูงแกะ ของพระเจ้า

5:4 แล้วบัด พระผู้เลี้ยงอันยิ่งใหญ่ฮั่น ได้มาปรากฏแล้ว พวกเจ้าสิได้มงกุฎประกอบด้วยพระสิริอันรุ่งเรือง ที่บ่มีการร่วงโรยไปเลย

5:5 ในทำนองเดียวกัน ผู้ที่อ่อนอายุในพวกเจ้า ให้นอบน้อมถ่อมโตต่อผู้ปกครองผู้มีอายุกว่าเด้อ เอ้อ ให้พวกเจ้าคู่คนยอมนอบน้อมต่อกันและกัน อาศัยการเจียมเนื้อเจียมโตเป็นคือเครื่องนุ่งห่มเด้อ ด้วยว่า “พระเจ้าต่อต้านคนเย่อหยิ่งจองหอง แต่ประทานพระกรุณาธิคุณให้กับคนถ่อมใจ”

5:6 จั่งซั้น ให้ถ่อมใจลง อยู่ภายใต้อุ้งมืออันมีฤทธิ์ของพระเจ้าเด้อ แล้วเพิ่นสิได้ซูพวกเจ้าขึ้น บัดฮอดยามเวลาอันเหมาะฮั้น

5:7 แล้วจั่งมอบความกระวนกระวายของพวกเจ้าไว้กับพระเจ้า ย้อนว่าเพิ่นห่วงใยพวกเจ้า

5:8 จั่งให้มีสติรอบคอบ ฮู้จักการประมาณโตเด้อ ย้อนว่าศัตรูของพวกเจ้า ได้วนเวียนไปมาคือจั่งสิงห์โตคำราม เที่ยวซอกหาคนที่มันสิกัดกินได้

5:9 ให้ต่อต้านมันเด้อ ด้วยการยืนมั่นในความเชื่อ โดยฮู้กันว่า ความยากลำบากอย่างที่พวกเจ้าพวมทนเอาอยู่ฮั้น ได้มีกับพี่น้องทั้งหลายของพวกเจ้า ผู้ที่อยู่ในโลกคือกัน

5:10 แล้วขอให้พระเจ้า ผู้มีพระกรุณาธิคุณทั้งเมิ้ด ผู้เพิ่นที่ได้เอิ้นได้เชิญให้พวกเจ้ามาสู่พระสิริอันนิรันดร์ของเพิ่น โดยทางพระเยซูคริสต์ หลังจากพวกเจ้าได้ทนเอาความทุกข์อยู่หน่อยหนึ่ง จั่งสิโปรดให้พวกเจ้าสู่การดีพร้อมสมบูรณ์แบบ ตั้งให้มั่นคง แข็งแฮง มีรากฐานถาวร

5:11 จั่งขอพระเกียรติ กับอำนาจครอบครองมีแด่เพิ่นตลอดกาลเป็นนิตย์ อาเมน

5:12 เฮาเปโตรได้เขียนมายังพวกเจ้าอย่างย่อๆ ส่งด้วยมือนายสิลวานัส ซึ่งเฮาถือว่าเป็นพี่น้องที่สัตย์ซื่อภักดีในพระเจ้า เฮาจั่งเตือนสติกับเป็นพยานต่อพวกเจ้าว่า นี้กะเป็นเรื่องพระกรุณาธิคุณที่แท้จริงของพระเจ้า ซึ่งพวกเจ้าพวมยืนอยู่

5:13 แล้วพี่น้องกลุ่มผู้เชื่ออยู่เมืองบาบิโลน ผู้ซึ่งเลือกสรรไว้นำกันกับพวกเจ้า ฝากความคึดฮอดมายังพวกเจ้า พร้อมกับมาระโก ลูกของเฮา ในพระเจ้า นำ

5:14 ให้ทักทายซึ่งกันและกันด้วยความฮักตามธรรมเนียมเด้อ จั่งขอให้สันติภาพดำรงอยู่กับพวกเจ้าทั้งหลายอยู่ในพระเยซูคริสต์เทอญ อาเมน