3:1 ถ้อยคำนี้เป็นคำสัตย์จริง คือคั่นว่า ซายคนใดปรารถนาอยากเป็นผู้เบิ่งแยง ในกลุ่มผู้เซื่อ ผู้ฮั้นได้ปรารถนาการงานดี

3:2 ผู้เบิ่งแยงฮั้น ต้องบ่มีที่ติว่ากล่าวได้ มีใจให้เมียผู้เดียว เป็นคนฮู้จักควบคุมโตเอง เป็นคนมีสติฮู้จักประมาณโต เป็นคนมีการประพฤติเรียบร้อยดี เป็นคนมักต้อนฮับแขก สามารถเป็นครูสอนได้

3:3 เป็นคนบ่ติดเหล้าองุ่น บ่เป็นคนนักเลงหัวไม้ บ่เป็นคนเห็นแก่เงินแก่ได้ แต่ว่าเป็นคนอ่อนสุภาพ บ่เป็นคนมักหาเรื่องอาละวาด

3:4 เป็นคนฮู้จักปกครองครัวเฮือนของโตเองให้เรียบร้อยดีงาม มีลูกเต้าที่ฮู้จักเซื่อฟังด้วยความสง่าผ่าเผย

3:5 (คือ คั่นว่าซายคนใดบ่ฮู้จักการปกครองครัวเฮือนของโตเอง เขากะสิเบิ่งแยงกลุ่มผู้เซื่อของพระเจ้าได้จั่งใด)

3:6 แล้วบ่แม่นคนเซื่อใหม่ๆ บ่ซั้นเขาอาจสิเกิดการเย่อหยิ่งขึ้นมา แล้วสิล้มลงตกอยู่ในสภาพการตัดสินคือจั่งเจ้ามารซาตานฮั่นเอง

3:7 หลายกว่าฮั้นอีก ซายผู้ฮั้นสิต้องมีซื่อเสียงดีกับคนภายนอกนำ เพื่อเขาสิบ่ถืกติเตียนเว้าใส่ จั่งตกอยู่ในกับดักของเจ้ามารซาตาน

3:8 แล้วเซ่นกัน ซายผู้ใดที่สิเป็นผู้ซ่อยงานผู้เบิ่งแยง กะต้องเป็นคนมีนิสัยน่านับถือ เว้าแต่แนวจริงใจ บ่เป็นคนสองลิ้น บ่เป็นคนติดเหล้าองุ่น บ่เป็นคนขี้โลภเงินเห็นแก่ได้

3:9 แต่เป็นคนยึดถือในข้อล้ำลึกของความเซื่อ มีจิตใต้สำนึกผิดซอบสะอาดผ่องใส

3:10 แล้วคนหมู่นี้กะให้พิสูจน์เบิ่งก่อน จั่งสิปล่อยมือให้ปรนนิบัติงานผู้ซ่อย คั่นเห็นว่าบ่มีที่ติว่ากล่าวได้

3:11 ฝ่ายเมียของเขากะคือกัน ต้องเป็นคนมีนิสัยน่านับถือ บ่เป็นคนใส่ร้ายป้ายสี แต่ว่าเป็น ญิงที่มีสติรอบคอบ ฮู้จักการประมาณโต สัตย์ซื่อเซื่อใจได้ในเมิ้ดคู่แนว

3:12 แล้วให้ผู้ซ่อยงานผู้เบิ่งแยง มีใจให้เมียผู้เดียว ฮู้จักฝึกสอนลูกเต้า ปกครองครัวเฮือนของโตเองให้เรียบร้อยดี

3:13 คือผู้ที่เคยปรนนิบัติงานผู้ซ่อยได้ดี กะได้ฐานะดีงามให้โตเอง มีใจกล้าหลายในทางความเซื่อ ซึ่งอยู่ในพระเยซูคริสต์

3:14 ข้อความแนวหมู่นี้ ข้อยเขียนฝากมายังเจ้าไว้ก่อน หวังว่าสิได้มาหาในไวๆ นี้

3:15 แล้วคั่นว่าข้อยมาซ้า ข้อยได้เขียนแนวนี้กะเพื่อเจ้าสิฮู้ว่าควรสิปฏิบัติโตแบบใดอยู่ในครัวเฮือนของพระเจ้า ซึ่งเป็นกลุ่มผู้เซื่อของพระเจ้าผู้ดำรงอยู่ ซึ่งเป็นหลักเป็นพื้นฐานแห่งความจริง

3:16 คือ มันเป็นที่ยอมฮับกันว่า ข้อล้ำลึกเรื่องพระเจ้ากะวิเศษอย่างยิ่ง ซึ่งพระเจ้าได้เสด็จลงมาฮับสภาพมีเนื้อหนังเป็นคน พิสูจน์ว่าเป็นผู้ซอบธรรมโดยทางพระวิญญาณ หมู่เทวทูตได้เห็น แล้วได้ฮับการประกาศต่อคนต่างซาติ มีคนได้ฮับเซื่อในโลก แล้วเพิ่นถืกฮับขึ้นสู่สง่าราศีอันรุ่งเรือง