6:1 ส่วนผู้คนที่อยู่ใต้แอกการเป็นทาสใซ้ฮั่น กะให้ถือว่านายเจ้าของสมควรสิได้ฮับเกียรติในเมิ้ดคู่อย่างเด้อ เพื่อพระนามของพระเจ้ากับหลักความเซื่อของเพิ่น สิบ่ถืกหมิ่นประมาท

6:2 แล้วส่วนทาสใซ้ผู้มีนายที่ฮับเซื่อแล้ว กะอย่าให้เขาดูหมิ่นนายเจ้าของเด้อ ย้อนว่านายของเขากะเป็นพี่น้อง ในพระเจ้า แต่ให้ผู้เป็นทาสใซ้ปรนนิบัตินายดีกว่า ย้อนว่าผู้ที่ฮับผลประโยชน์กะเป็นพี่น้องที่ฮักนำกัน ข้อความแนวหมู่นี้กะให้สั่งสอนแนะนำหนุนใจไว้เด้อ

6:3 คั่นแม่นว่า คนผู้ใดสอนแนวอื่นที่ผิดเพี้ยนไปจากข้อความแนวหมู่นี้ แล้วบ่ยอมฮับในคำสอนอันมีเหตุมีผล ซึ่งเป็นถ้อยคำของพระเยซูคริสต์เจ้าของพวกเฮา กับเป็นหลักความเซื่อซึ่งเป็นที่ถวายเกียรติพระเจ้า

6:4 คนแบบฮั้นกะเย่อหยิ่งจองหอง บ่ฮู้จักอีหยังเลย มัวแต่โต้เถียงในข้อขัดแย้งต่างๆ นี้กะเป็นเหตุให้เกิดการอิจฉาขัดเคืองใจกัน เว้าใส่ฮ้ายป้ายสีกัน คึดซั่วสงสัยซึ่งกันและกัน

6:5 ซึ่งเกิดการโต้แย้งกันของคนใจเสื่อมทรามในแนวที่บ่เป็นประโยชน์ บ่มีหลักความจริง คนพวกนี้เข้าใจผิดกันว่า การใซ้ซีวิตในทางถวายเกียรติพระเจ้าฮั้น ได้เป็นทางได้กำไรหาประโยชน์ให้โตเอง ให้เจ้าถอนโตให้พ้นจากคนแบบนี้เด้อ บ่ให้คบหา

6:6 แต่ว่าการถวายเกียรติพระเจ้าโดยความพึงพอใจ กะเป็นการได้กำไรหลายเป็นอย่างยิ่ง

6:7 คือว่า คนเฮาบ่ได้ขนเอาอีหยังเข้ามาในโลก ตอนที่เกิดมา แล้วแน่นอนบัดยามเฮาออกไป พวกเฮาสิบ่สามารถเอาอีหยังออกไปนำ

6:8 จั่งซั้น บัดมีแนวอยู่แนวกินแล้ว กะให้พวกเฮามีความพึงพอใจอยู่นำฮั่นเด้อ

6:9 แต่ว่า ฝ่ายคนที่อยากฮั่งอยากมี สิต้องตกอยู่ในกับดักอันล่อลวง หลงในตัณหาอันตรายหลายแนว ที่ดึงคนจมลงสู่ทางซิบหายวายวอด

6:10 ย้อนว่า การฮักใคร่เงินทองฮั่นกะเป็นแหล่งให้เกิดความซั่วคู่อย่าง ซึ่งผู้ลางคนได้หลงจากทางความเซื่อย้อนความขี้โลภของเขา แล้วในที่สุดกะแทงใจโตเองด้วยความทุกข์ทรมานหลายแนว

6:11 แต่สำหรับเจ้า ผู้เป็นคนของพระเจ้าฮั้น ให้หลีกหนีจากแนวบ่แม่นจั่งซี้เด้อ แล้วมุ่งหน้าไปตามทางซอบธรรมอันถืกต้อง ทางที่ถวายเกียรติพระเจ้า พร้อมทั้งความเซื่อ ความฮัก ความอดทนพากเพียร กับความสุภาพอ่อนน้อม

6:12 ให้อุตส่าห์สู้อย่างมุ่งมั่นเพื่อความเป็นเลิศในสนามแห่งความเชื่อเด้อ ยึดมั่นในซีวิตนิรันดร์เป็นหลัก ที่พระเจ้าได้เอิ้นได้เชิญเจ้ามาแล้วฮั้น ซึ่งเจ้าได้ฮับปากไว้ต่อพยานหลายคนแล้ว

6:13 ข้อยจั่งขอสั่งเจ้าต่อหน้าพระเจ้า ผู้เพิ่นได้โปรดประทานซีวิตให้เมิ้ดคู่แนว กับต่อหน้าพระเยซูคริสต์ ผู้เพิ่นเคยให้ถ้อยคำที่ดีต่อหน้าผู้กำกับปอนทัสปีลาต

6:14 ว่าให้เจ้าฮักษาข้อคำสั่งนี้ไว้ให้ดีเด้อ จั่งบ่มีที่ติว่ากล่าวได้ จนฮอดยามที่พระเยซูคริสต์เจ้า ผู้เป็นนายซีวิตของคนเฮา ได้เสด็จลงมาปรากฏพระองค์

6:15 ซึ่งบัดฮอดฤกษ์งามยามดีของเพิ่นฮั่น เพิ่นสิเสด็จกลับมาปรากฏพระองค์ว่า เป็นประมุขผู้มีพระเกียรติแต่ผู้เดียว เป็นพระมหากษัตริย์เหนือกษัตริย์ทั้งหลาย กับเป็นพระเจ้าเที่ยงแท้เหนือเจ้าทั้งหลาย

6:16 ผู้เพิ่นเป็นอมตะดำรงอยู่ตลอดกาลแต่ผู้เดียว ซึ่งประทับอยู่ในสภาพสง่าราศีอันสว่างจ้าที่บ่มีคนใดสามารถเข้าไปได้ กับบ่เคยมีใผเห็น แล้วบ่สามารถมองเห็นหน้าเพิ่นได้ ขอให้พระเกียรติกับฤทธานุภาพมีแด่พระองค์ตลอดเป็นนิตย์ อาเมน

6:17 จั่งซั้น ให้สั่งผู้ฮั่งมีทางโลกนี้ว่า บ่ให้ถือโตมักใหญ่ใฝ่สูง หรือเพิ่งหวังอยู่ในทรัพย์สมบัติอนิจจัง แต่ให้เพิ่งหวังอยู่ในพระเจ้าผู้เพิ่นอยู่อย่างอมตะ แม่นผู้ซึ่งโปรดประทานเมิ้ดคู่แนวให้กับคนเฮาอย่างเหลือล้น เพื่อสิได้อยู่อย่างสุขสำราญ

6:18 จั่งให้เขาประกอบการดี มั่งมีโดยคุณงามความดีอย่างเหลือล้น มีน้ำใจพร้อมที่สิบริจาคซ่อย แบ่งปันกับผู้อื่นๆ

6:19 เลยสะสมรากฐานอันดีงามขึ้นไว้ สำหรับมื้อทางหน้าที่สิมาเถิงฮั่น กะเพื่อพวกเขาสิได้ยึดถือในซีวิตนิรันดร์ไว้เป็นปึกแผ่นให้มั่นคง

6:20 โอ้ ทิโมธีเอ้ย ให้เฝ้าฮักษาหลักความจริงอันที่ข้อยได้มอบหมายไว้กับเจ้าเด้อ แล้วให้หลีกเลี่ยงการโต้เถียงขัดแย้งกันต่างๆ แนวบ้าๆบอๆ ที่นอกรีต ซึ่งเป็นแต่เรื่องต่ำซ้าที่ผู้ลางคนถือกันว่าเป็นวิซาความฮู้

6:21 ซึ่งผู้ลางคนได้ฮับเอาไว้แล้ว เลยหลงผิดพลาดไปจากหลักความเซื่อ สุดท้ายนี้ ขอให้พระกรุณาธิคุณของพระเจ้ามีอยู่นำเจ้าเด้อ อาเมน [ จดหมายฉบับแรกถึงทิโมธี เขียนจากเมืองเลาดีเซีย ซึ่งเป็นนครหลวงในแคว้นฟรีเจีย-ปาคาทีอานา ]