1:1 จาก ซีโมนเปโตร ข้าฮับใช้กับทูตพิเศษของพระเยซูคริสต์ เรียนมายังผู้คนทั้งหลายผู้ที่มีความเซื่ออันประเสริฐล้ำค่าอย่างเดียวกันกับพวกเฮา โดยความซอบธรรมของพระเยซูคริสต์ ผู้เป็นพระเจ้ากับพระผู้โปรดของคนเฮา

1:2 จั่งขอให้พระกรุณาธิคุณกับสันติภาพ เพิ่มพูนหลายขึ้นให้พวกเจ้า โดยการฮู้จักเข้าใจดีในเรื่องพระเจ้า กับในเรื่องพระเยซูเจ้า นายซีวิตของพวกเฮาทั้งหลาย

1:3 คือโดยทางฤทธานุภาพของพระเจ้า เพิ่นได้ประทานสิ่งสารพัดครบเมิ้ดให้พวกเฮาแล้ว เกี่ยวกับซีวิตความเป็นอยู่ กับการถวายเกียรติพระเจ้า โดยการฮู้จักดีเถิงเพิ่น ผู้เพิ่นได้เอิ้นได้เชิญพวกเฮามา ทางพระสิริ กับคุณงามความดีของเพิ่น

1:4 ด้วยนี้ล่ะ เพิ่นประทานคำมั่นสัญญาอันประเสริฐล้ำค่า หลายประการอันใหญ่ยิ่ง ที่ให้ไว้กับพวกเฮาแล้ว เพื่อว่า ด้วยแนวหมู่นี้ พวกเจ้ามีส่วนฮ่วมในการเป็นพระเจ้าของเพิ่น ซึ่งได้รอดพ้นจากความเสื่อมสลายทางโลกแล้ว กับความกระหายทางราคะตัณหาของมัน

1:5 ย้อนเหตุนี้เอง ให้อุตส่าห์จนสุดกำลัง เอาคุณความดีมาเสริมใส่ความเซื่อเด้อ แล้วเอาความรอบรู้มาเสริมใส่คุณความดี

1:6 แล้วเอาการฮู้จักบังคับตนมาเสริมใส่ความรอบรู้ แล้วเอาความอดทนไว้นานมาเสริมใส่การฮู้จักบังคับตน แล้วเอาการถวายเกียรติพระเจ้า มาเสริมใส่ความอดทนไว้นาน

1:7 แล้วเอาความเมตตาปรานีพี่น้อง มาเสริมใส่การถวายเกียรติพระเจ้า แล้วเอาความฮักแบบของพระเจ้า มาเสริมใส่ความเมตตาปรานีพี่น้อง

1:8 คือ คั่นว่าคุณสมบัติแนวหมู่นี้เป็นของพวกเจ้าอย่างเพิ่มพูนขึ้น ซีวิตของพวกเจ้าสิบ่เปล่าประโยชน์ไป กับสิบ่ไร้เหตุไร้ผลในการฮู้จักเถิงองค์พระเยซูคริสต์เจ้า นายซีวิตของพวกเฮา

1:9 แต่ผู้ที่ขาดคุณสมบัติแนวหมู่นี้ เป็นคนสายตาสั้นเถิงบอด ลืมฮอดโตเขาเอง ว่าได้ฮับการชำระจากความผิดบาปเก่าของเขาแล้ว

1:10 จั่งซั้น พี่น้องทั้งหลายเอ้ย ให้อุตส่าห์ใส่ใจอย่างยิ่ง พิสูจน์ว่าการเอิ้นมากับการเลือกสรรของพวกเจ้าฮั้น มันมั่นคงส่ำใด คือคั่นพวกเจ้าเฮ็ดแนวจั่งซี้ พวกเจ้าสิบ่ได้สะดุดล้มลงจักเทื่อเลย

1:11 ด้วยว่า ทางเข้าอาณาจักรอันนิรันดร์ของพระเยซูคริสต์ พระผู้โปรดของพวกเฮา สิถืกเปิดไว้อย่างกว้างขวางให้พวกเจ้า

1:12 ย้อนเหตุนี้เอง ข้อยสิบ่ได้หยุดยั้ง ที่สิเตือนสติพวกเจ้า เถิงแม้นว่าพวกเจ้าฮู้จักอยู่ กับตั้งมั่นอยู่ในความจริงอยู่แล้ว

1:13 เออ ข้อยเห็นสมควรว่า บัดข้อยยังอยู่ในคาบที่อาศัยนี้ ที่สิเตือนความจำจื่อของพวกเจ้าไว้อยู่เสมอเถิงแนวหมู่นี้

1:14 ย้อนข้อยฮู้อยู่ว่า อีกบ่ซ้าบ่โดน เฮากะสิต้องสละคาบของเฮานี้ไป ตามที่พระเยซูคริสต์เจ้าของเฮาได้ดลใจให้ข้อยฮู้จัก

1:15 ยิ่งกว่าฮั้นอีก ข้อยพยายามเตือนสติย้ำให้พวกเจ้าคึดเถิงคึดซวดในข้อความแนวหมู่นี้อยู่เสมอ หลังจากข้อยออกจากโลกไปแล้ว

1:16 ย้อนว่า พวกเฮาบ่ได้ติดตามนิทานอันฉลาดที่ถืกก่อขึ้นมา ตอนที่พวกเฮาได้บอกเถิงเรื่องฤทธานุภาพ กับการมาของพระเยซูคริสต์เจ้าของเฮา แต่เฮาได้เห็นบารมีของเพิ่นกับตาโตเอง

1:17 คือ พระเยซูได้ฮับเกียรติกับพระสิริจากพระเจ้าผู้เป็นพ่อ ตอนมีพระสุรเสียงได้ออกจากที่พระสิริอันประเสริฐ มายังพระเยซู บอกว่า “เจ้าลูกที่ฮักแพงของเฮาเอ้ย เฮาพึงพอใจในเจ้าหลาย”

1:18 กับว่า ตอนที่พวกเฮาได้ยินพระสุรเสียงนี้กึกก้องออกมาจากสวรรค์ พวกเฮากะได้อยู่กับพระเยซูอยู่เทิงภูเขาหม่องอันศักดิ์สิทธิ์บริสุทธิ์ฮั้น

1:19 แล้ว แฮงหลายกว่าฮั้นอีก พวกเฮามีคำทำนายที่พิสูจน์มาอย่างแน่นอนได้แล้ว ซึ่งมันเป็นการดีคั่นพวกเจ้าสิเอาใจใส่ในถ้อยคำฮั้น คือจั่งแสงที่ส่องเข้าไปในหม่องดำมืด จนกว่าสิซอดแจ้ง แล้วดาวประจำรุ่งปรากฏขึ้นมาในหัวใจของพวกเจ้า

1:20 โดยฮู้กันไว้ก่อนว่า บ่เคยมีคำทำนายในพระคำ ที่เป็นไปตามความคึดเห็นส่วนโตของคนใดคนหนึ่งเลย

1:21 คือ คำทำนายฮั้น บ่เคยเป็นมาตามจุดประสงค์ของคน แต่คนบริสุทธิ์ของพระเจ้าได้กล่าวไว้ตามการทรงนำของพระวิญญาณ