2:1 จั่งซั้น ทิโมธี ลูกฝ่ายวิญญาณของข้อยเอ้ย ให้เจ้ามีใจเข้มแข็งในพระกรุณาธิคุณซึ่งมีอยู่ในพระเยซูคริสต์เด้อ

2:2 แล้วแนวที่เจ้าได้ยินจากข้อยต่อหน้าพยานหลายคนฮั่น กะให้มอบไว้ให้กับซายผู้สัตย์ซื่อภักดีเด้อ คือผู้ที่สามารถสอนคนอื่นๆ ถ่ายทอดต่อๆ กันได้นำ

2:3 จั่งซั้น ให้เจ้าอดเอาต่อความทุกข์ยากลำบากเพื่อพระเจ้า อย่างเป็นทหารที่ดีของพระเยซูคริสต์เด้อ

2:4 คือบ่มีทหารคนใดที่เคยเข้าประจำการแล้ว แล้วยังมั่วยุ่งกับการงานซีวิตฝ่ายโลกนี้ เพื่อสิได้ถืกใจนายผู้ที่ฮับสมัครเขาให้เป็นทหาร

2:5 แล้วคั่นผู้ใดแข่งขันเพื่อหวังคว้าเอาซัยซนะ ผู้ฮั้นสิบ่มีสิทธิ์ฮับพวงมาลัยนอกจากว่าเขาสู้แข่งตามกฎกติกาของกีฬาฮั่น

2:6 กับว่า ซาวนาผู้ใดที่ลงมือเฮ็ดไฮ่เฮ็ดนาอย่างหนัก กะต้องเป็นผู้แรกที่ได้ฮับผลก่อน

2:7 ให้เจ้าพิจารณาในแนวที่ข้อยเว้าหนิ แล้วขอพระเจ้าที่สิโปรดให้เจ้ามีความเข้าใจในเมิ้ดคู่แนว

2:8 อย่าลืมเด้อ พระเยซูคริสต์ซึ่งเป็นเซื้อสายกษัตริย์ดาวิด ได้ฮับการเป็นขึ้นมาจากตายแล้ว ตามข่าวประเสริฐของข้อยประกาศฮั่น

2:9 ย้อนเหตุเรื่องนี้ล่ะ ข้อยจั่งถืกการทุกข์ยากลำบากปานโจรผู้ร้าย ฮอดถืกล่ามโซ่ไว้นำ แต่ว่าพระคำของพระเจ้าบ่มีการผูกมัดจำกัดไว้ได้เลย

2:10 จั่งซั้นข้อยจั่งยินดีทนเอาเมิ้ดคู่แนว เพื่อผู้คนที่พระเจ้าได้เลือกสรรไว้ฮั่น คือผู้คนที่สิฮับความรอดพ้น ที่ประกอบด้วยสง่าราศีอันนิจนิรันดร์ ซึ่งมีอยู่ในพระเยซูคริสต์

2:11 นี้กะเป็นคำสัตย์จริงที่ว่า คั่นพวกเฮาตายฮ่วมกับพระเยซูคริสต์แล้ว พวกเฮากะสิได้ฮับซีวิตใหม่นำกันกับเพิ่น

2:12 แล้วคั่นพวกเฮาทนเอา เฮากะสิได้ปกครองฮ่วมกันกับเพิ่น แต่ว่าคั่นเฮาปฏิเสธเพิ่น เพิ่นกะสิปฏิเสธเฮาคือกัน

2:13 คั่นพวกเฮาขาดความเซื่อ เพิ่นกะยังสัตย์ซื่อภักดีอยู่เสมอ ย้อนว่าเพิ่นบ่สามารถปฏิเสธการเป็นพระเจ้าของเพิ่นเอง

2:14 ข้อความแนวหมู่นี้ ให้เจ้าเตือนความจำของพวกเขาเด้อ บอกสอนเขาต่อหน้าพระผู้เป็นเจ้าว่า บ่ให้เถียงกันในข้อโต้แย้งต่างๆ แนวบ่เป็นสาระ มันมีแต่ทำลายความเซื่อของผู้ฮับฟังฮั้น

2:15 ให้อุตส่าห์ถวายโตเป็นที่พึงพอใจต่อหน้าพระเจ้า เป็นคนงานที่บ่ต้องอับอายเลย โดยฮู้จักการแบ่งแยกข้อพระคำแห่งความจริงออกให้ถืกต้อง

2:16 แต่ว่าให้หลีกเลี่ยงจากคำบ้าๆบอๆ อันบ่เป็นสาระเด้อ ย้อนว่ามันเกิดแนวที่บ่ถวายเกียรติพระเจ้าแฮงหลายขึ้น

2:17 แล้วถ้อยคำของคนพวกนี้สิลามออกไป คือปานโรคขี้มะเฮ็ง ซึ่งในคนพวกนี้กะมี ฮีเมเนอัส กับ ฟิเลทัส

2:18 ซึ่งสองคนนี้ได้พลาดหลงจากหลักความจริงไปแล้ว คือเขาเว้าว่า การเสด็จมาของพระเยซูฮั่นได้ผ่านพ้นไปแล้ว ซึ่งคว่ำความเซื่อของผู้ลางคนลง

2:19 จั่งใดกะตาม หลักความจริงของพระเจ้าฮั่นได้ยั่งยืนอย่างมั่นคงอยู่ตลอด ตามที่มีคำจารึกไว้ว่า “องค์พระผู้เป็นเจ้าฮู้จักคนของเพิ่น” กับว่า “ให้คู่คนที่ออกพระนามของพระคริสต์ หันออกไปจากความซั่ว”

2:20 คือในวังใหญ่มีเครื่องใซ้หลายแนว บ่ว่าแต่เงินแต่ทอง มีเครื่องใซ้แนวที่เป็นไม้เป็นดินเหนียวนำ จั่งซั้นลางอันมีไว้เพื่อมีเกียรติ แล้วลางอันกะบ่มีเกียรติ

2:21 จั่งซั้น คั่นผู้ใดซำระโตเองให้ออกจากแนวบ่มีเกียรติฮั้น ผู้ฮั้นกะสิเป็นเครื่องใซ้อันมีเกียรติ เหมาะดีสำหรับการใซ้งานของนาย พร้อมสำหรับงานอันดีเมิ้ดคู่อย่าง

2:22 จั่งซั้น ให้หลีกหนีจากกิเลสของคนหนุ่ม แล้วติดตามความชอบธรรม ความเซื่อ ความฮัก กับสันติภาพ ฮ่วมกันกับคนทั้งหลายที่ฮ้องออกพระนามขององค์พระผู้เป็นเจ้าด้วยใจบริสุทธิ์

2:23 แต่ว่าส่วนข้อเถียงกันในเรื่องบ้าๆบอๆ อันโง่ ฮั้น กะให้หลีกเลี่ยงโดยฮู้ว่า แนวหมู่นี้เกิดแต่การโต้แย้งกันซื่อๆ

2:24 ส่วนผู้ฮับใซ้ของพระเจ้าฮั้น บ่ควรสิโต้เถียงกันเลย แต่ควรมีใจอ่อนสุภาพต่อคู่คน สามารถเป็นครูสอน มีความพากเพียรอดทน

2:25 กับแนะนำฝ่ายพวกต่อต้านด้วยความสุภาพเยือกเย็น หวังว่าหาลางเทื่อพระเจ้าอาจสิโปรดให้เขากลับใจ จั่งสิฮู้จักในเรื่องความจริง

2:26 กับเพื่อเขาอาจฮู้เมื่อโต จั่งได้รอดพ้นจากกับดักของเจ้ามารซาตานฮั่น คือผู้ที่ถืกดักจับไว้ให้เฮ็ดตามจุดประสงค์ของมัน