4:1 ฝ่ายผู้เป็นนายทาสฮั้น กะให้เฮ็ดนำทาสฮับใซ้ของโตด้วยความเที่ยงธรรมตามสมควรเด้อ โดยฮู้กันว่าพวกเจ้ากะยังมีนายอยู่เทิงสวรรค์คือกัน

4:2 ให้อธิษฐานเว้านำพระเจ้าอย่างเอาจริงเอาจังต่อไปด้วยความหมั่นเพียรเด้อ มีใจเฝ้าระวังอยู่ในการฮั้นด้วยการขอบพระคุณนำ

4:3 แล้วในระหว่างฮั้น ซ่อยอธิษฐานเว้านำพระเจ้าเผื่อพวกเฮานำแหน่ ว่าพระเจ้าสิเปิดประตูไว้เป็นทาง เพื่อพวกเฮาสิมีโอกาสประกาศพระคำ เถิงความลึกลับเรื่องพระคริสต์ ซึ่งเป็นเหตุที่ข้อยถืกกักขังล่ามโซ่ไว้

4:4 เพื่อข้อยอาจสิเปิดเผยเรื่องนี้ให้แจ่มแจ้ง ตามที่ข้อยควรประกาศฮั่น

4:5 แล้วฝ่ายพวกเจ้า กะให้ใซ้ซีวิตด้วยสติปัญญาต่อผู้คนอยู่ภายนอกเด้อ โดยใซ้โอกาสในคู่ยามเวลา

4:6 แล้วให้ความเว้าของพวกเจ้ามีเหตุมีผล ประกอบด้วยพระกรุณาธิคุณอยู่เสมอ ให้เป็นตาฟังคือจั่งปรุงรสซาดด้วยเกลือ เพื่อสิฮู้ว่าสมควรสิตอบแต่ละคนว่าจั่งใดดี

4:7 ส่วนนายทีคิกัสฮั้น ลาวสิไปเว้าปันพวกเจ้าฟังเถิงข่าวเรื่องข้อยอยู่ทางนี้ ลาวกะเป็นน้องฮักแพง เป็นหมู่ฮ่วมงานในการฮับใซ้องค์พระผู้เป็นเจ้านำ

4:8 คือข้อยสิใซ้ลาวไปหาพวกเจ้า กะเพื่อลาวสิฮู้เห็นเถิงสถานการณ์แวดล้อมของพวกเจ้า แล้วหนุนน้ำใจพวกเจ้านำ

4:9 กับข้อยสิใซ้ นายโอเนสิมัสไปนำ ผู้เป็นน้องฮักแพง มีใจจงรักภักดี เป็นไทเมืองเดียวกันกับพวกเจ้านำ แล้วเขาจั่งสิบอกให้พวกเจ้าฮู้เถิงเรื่องต่างๆ ที่เป็นไปอยู่ทางนี้

4:10 ส่วน นายอาริสทารคัส หมู่ถืกจองจำฮ่วมกันกับข้อย ลาวฝากความคึดฮอดมายังพวกเจ้านำ กับมาระโก ผู้เป็นลูกพี่ลูกน้องของบารนาบัสฮั้น แม่น ผู้นี้ล่ะ ที่ทางนี้เคยฝากความไว้แล้วว่า คั่นเขามาหาพวกเจ้า กะให้ต้อนฮับเขาเอาเด้อ

4:11 พร้อมทั้ง นายเยซู ที่คนเอิ้นซื่อกันว่า ยุสทัส แม่นคนพวกนี้ท่อฮั้นที่เป็นหมู่คนยิวของข้อย ที่ฮ่วมงานฮับใซ้นำข้อยเพื่อแผ่นดินของพระเจ้า แล้วหมู่พวกนี้เคยปลอบโยนหนุนใจข้อยนำ

4:12 แล้ว นายเอปาฟรัส ซึ่งเป็นไทเมืองเดียวกันกับพวกเจ้า กับเป็นข้าฮับใซ้ของพระคริสต์ ฝากความคึดฮอดมายังพวกเจ้านำ ลาวมีใจจดจ่อในการอธิษฐานเว้านำพระเจ้าเผื่อพวกเจ้าอยู่เสมอ ว่าพวกเจ้าสิยืนมั่นคง เป็นผู้ใหญ่อย่างสมบูรณ์แบบครบคู่ทาง ตามพระประสงค์ของพระเจ้า

4:13 คือ ข้อยหนิเป็นพยานยืนยันให้ลาวได้ว่า ลาวมีใจกระตือรือร้นหลายเพื่อพวกเจ้า กับเผื่อพี่น้องที่อยู่เมืองเลาดีเซีย พร้อมทั้งพี่น้องที่อยู่เมืองฮีเอราบุรีนำ

4:14 ส่วนนายแพทย์ลูกา คุณหมอที่เป็นตาฮัก กับนายเดมาส ทั้งสองได้ฝากความคึดฮอดมายังพวกเจ้านำ

4:15 แล้วขอฝากความคึดฮอดไปยังพวกพี่น้องอยู่เมืองเลาดีเซีย กับเถิง นายนิมฟัส พร้อมทั้งฝากความคึดฮอดไปยังกลุ่มผู้เซื่อคู่คนที่โฮมกันอยู่ในเฮือนของลาวนำแหน่

4:16 แล้วบัดยามอ่านจดหมายฉบับนี้ให้ไทพวกเจ้าฟังแล้ว กะให้แลกเปลี่ยนกันอ่านกับจดหมายฉบับที่อยู่เมืองเลาดีเซียฮั้นนำ

4:17 แล้วให้ซ่อยบอกนายอารคิปปัสว่า “นี่แน่ะ ให้เอาใจใส่ในงานฮับใซ้ที่องค์พระผู้เป็นเจ้าได้มอบหมายไว้ให้เจ้าฮั้น จั่งปรนนิบัติเถิงความสำเร็จเด้อ”

4:18 คำทักทายสุดท้ายนี้ ข้อยเปาโลได้ลงไว้โดยลายมือของข้อยเอง กรุณาอย่าลืมโซ่ตรวนของข้อยนำแหน่ ขอให้ฮ่มพระคุณดำรงอยู่นำพวกเจ้าเทอญ อาเมน [ เขียน จากกรุงโรมเถิงชาวโคโลสี และส่งโดยทีคิกัสกับโอเนสิมัส ]