6:1 แล้วสำหรับผู้เป็นลูก กะให้เซื่อฟังพ่อแม่ โดยเห็นแก่พระเจ้าเด้อ ย้อนว่า การเฮ็ดแนวนี้กะเป็นการถืกต้องแล้ว

6:2 ให้ “เคารพให้เกียรติพ่อแม่” ได้เป็นข้อแรกในกฎบัญญัติ ที่มีคำสัญญาไว้พร้อม

6:3 สัญญาว่า “เพื่อเจ้าสิอยู่ดีมีแฮง มีซีวิตยืนยาวในโลกนี้”

6:4 แล้วสำหรับผู้เป็นพ่อ กะอย่าเฮ็ดยั่วลูกให้โกรธฮ้ายเด้อ แต่ให้คอยเลี้ยงเบิ่งไว้ ด้วยการฝึกอบรมตามหลักคำสอนขององค์พระผู้เป็นเจ้าเด้อ

6:5 สำหรับผู้เป็นทาสฮับใซ้ กะให้เคารพเซื่อฟังฮับใซ้นายทางโลกนี้ ด้วยเกรงกลัวโตสั่น ด้วยมีใจเดียวคือปานฮับใซ้พระคริสต์

6:6 บ่แม่นเฮ็ดดียามอยู่ต่อหน้า คือจั่งพวกผู้ที่มักเฮ็ดเอาใจคน แต่ให้เฮ็ดอย่างสมกับว่าเป็นผู้ฮับใซ้ของพระเยซูคริสต์ คือเฮ็ดตามจุดประสงค์พระเจ้าจากใจจริง

6:7 ให้ฮับใซ้ด้วยน้ำใจดี คือปานฮับใซ้องค์พระผู้เป็นเจ้า บ่แม่นฮับใซ้คนซื่อๆ

6:8 โดยฮู้กันไว้ว่า แนวดีงามที่คนผู้ใดได้เฮ็ด ผู้ฮั้นกะสิฮับการตอบแทนแนวเดียวกันจากองค์พระผู้เป็นเจ้า สิเป็นทาสหรือไทกะอย่า

6:9 แล้วสำหรับผู้เป็นนาย กะให้เฮ็ดดีนำเขาคือกันเด้อ ให้มีใจอดทน อย่าขู่เข็ญฮ้ายเขา โดยฮู้กันว่า นายของเจ้ากะอยู่เทิงสวรรค์ แล้วเพิ่นบ่ได้เข้าข้างเห็นแก่หน้าผู้ใดเลย

6:10 สุดท้ายนี้ พี่น้องเอ้ย ให้เข้มแข็งในองค์พระผู้เป็นเจ้าเด้อ ซึ่งฤทธิ์อำนาจของเพิ่นเป็นกำลังของเจ้า

6:11 ให้เตรียมพร้อมโดยสวมซุดนักรบของพระเจ้าเด้อ เพื่อเจ้าสิสามารถยืนมั่นคงได้ ต่อลูกเล่นอันเล่ห์เหลี่ยมของพญามาร

6:12 ย้อนว่า พวกเฮาบ่ได้ต่อสู้กับคน แต่ได้สู้กับเทวดาผู้ศักดิ์สิทธิ์ กับเทวดาผู้มีอำนาจสูง กับเทวดาผู้ที่ครองเหนือความมืดทางยุคนี้ กับพวกวิญญาณที่เป็นเจ้าแห่งความซั่วในที่สูงอยู่ท้องฟ้า

6:13 จั่งซั้น ให้ฮับเอาซุดนักรบของพระเจ้าเด้อ เพื่อสิต่อต้านได้ในมื้อซั่วฮ้าย แล้วพอเฮ็ดเมิ้ดแล้วกะสิยืนอยู่ได้อย่างมั่นคง

6:14 จั่งซั้น ให้ยืนอยู่ฮั้นโดยอาศัยความสัตย์จริงเป็นแนวคาดแอว แล้วอาศัยความซอบธรรมต่อพระเจ้าเป็นเสื้อเกราะป้องกันหน้าเอิก

6:15 กับอาศัยการเตรียมพร้อมในข่าวประเสริฐแห่งสงบสุขสวมไว้เป็นแนวป้องกันตีน

6:16 แล้วเหนือกว่าเมิ้ดฮั้น ให้อาศัยความเซื่อ เป็นโล่เพื่อฮับมอดลูกศรไฟของมารฮ้ายฮั้น

6:17 แล้วให้อาศัยความรอดพ้นเป็นหมวกป้องกันหัว กับให้ฮับเอาพระแสงซึ่งเป็นดาบสู้ฝ่ายพระวิญญาณ แม่นพระคำของพระเจ้า

6:18 แล้วจั่งอธิษฐานวอนขอนำพระเจ้าโดยในพระวิญญาณอยู่เสมอ ให้มีใจจดจ่อ พากเพียรในคู่อย่าง วอนขอเพื่อพี่น้องคนของพระเจ้าเมิ้ดคู่คน

6:19 แล้วให้วอนขอเพื่อข้อยนำแหน่ เพื่อข้อยสิได้ฮับคำเว้า กับมีความกล้าในความเว้านำ เพื่อสิได้บอกสอนให้คนฮู้จักในข้อล้ำลึกทางข่าวประเสริฐฮั่น

6:20 แม่นย้อนเรื่องหนิล่ะ ที่ข้อยผู้เป็นทูตที่ถืกล่ามโซ่ไว้ ซึ่งแม้นแต่ในกรณีนี้ ข้อยสิได้เว้าอยู่อย่างกล้าหาญตามที่ควร

6:21 แล้วเพื่อพวกเจ้าสิได้ฮู้ข่าวของข้อยอยู่ทางนี้ มีคนซื่อว่า ทีคิกัส ซึ่งผู้นี้เป็นน้องฮักในพระเจ้า เป็นผู้ซื่อสัตย์ที่ฮับใซ้องค์พระผู้เป็นเจ้าด้วยใจจริง เพิ่นเองสิบอกเมิ้ดคู่แนวให้พวกเจ้าฮู้จัก

6:22 ซึ่งข้อยได้ใซ้เขามาหาพวกเจ้าเพื่อเหตุนี้โดยเฉพาะ คือเพื่อพวกเจ้าสิฮู้จักเรื่องความเป็นอยู่ของพวกเฮาอยู่ทางนี้ แล้วเพื่อเพิ่นสิหนุนใจพวกเจ้านำ

6:23 สุดท้ายนี้ ขอให้พี่น้องมีความสงบสุข ความฮัก พร้อมทั้งความเซื่อมั่น จากพระเจ้าผู้เป็นพ่อ กับจากองค์พระเยซูคริสต์เจ้า

6:24 แล้วขอให้พระกรุณาธิคุณมีแด่คู่คนที่ฮักองค์พระเยซูคริสต์เจ้าของพวกเฮาด้วยใจจริง เทอญ อาเมน [ เขียนเถิงซาวเอเฟซัสจากกรุงโรม ส่งโดย ทีคิกัส ]