1:1 จากเปาโล ผู้เป็นทูตพิเศษ ของพระเยซูคริสต์ (บ่แม่นด้วยคน หรือบ่ได้ผ่านการแต่งตั้งของคน แต่ว่าโดยพระเยซูคริสต์ กับโดยพระเจ้าผู้เป็นพ่อ ผู้เพิ่นที่โปรดให้พระเยซูเป็นขึ้นมาจากตาย)

1:2 กับจากพวกพี่น้องคู่คนที่อยู่นำข้อยทางนี้นำ เรียนพี่น้องในกลุ่มผู้เซื่ออยู่เมืองกาลาเทีย

1:3 ขอให้พระกรุณาธิคุณ กับสันติภาพจากพระเจ้า ผู้เป็นพ่อ กับจากพระเยซูคริสต์เจ้า คุ้มครองฮักษาพวกเจ้าไว้เด้อ

1:4 ผู้เพิ่นได้ยอมสละซีวิตย้อนบาปของเฮา เพื่อสิกอบกู้พวกเฮาให้รอดพ้นแนวซั่วฮ้ายทางโลกนี้ ตามพระประสงค์ของพระเจ้าผู้เป็นพ่อของพวกเฮา

1:5 สาธุการพระเจ้า ผู้สมควรได้ฮับการยกย่องถวายเกียรติอยู่ตลอดกาล อาเมน

1:6 บัดนี้ ข้อยเป็นตางึดหลายที่ว่า บึดเดียวพวกเจ้าได้หันหลังให้พระเจ้าแล้ว ผู้เพิ่นได้เอิ้นพวกเจ้าเข้ามาสู่พระคุณของเพิ่นทางพระคริสต์ หันไปติดตามข่าวประเสริฐจอมปลอม

1:7 ซึ่งบ่แม่นข่าวอื่นๆ ดอก แต่ว่ามีผู้ลางคนได้มาก่อกวนพวกเจ้า มาบิดเบือนข่าวประเสริฐเรื่องพระคริสต์ฮั้น

1:8 แต่ว่า คั่นพวกข้อยเอง หรือเทวทูตจากสวรรค์ หรือใผกะอย่า มาประกาศข่าวประเสริฐอื่นๆ ให้พวกเจ้าฟัง ที่เพี้ยนจากข่าวประเสริฐที่พวกเฮาได้มาประกาศแล้ว กะขอให้เขาถืกการสาปแซ่งเด้อ

1:9 ตามที่พวกข้อยเคยบอกมาแล้ว ข้อยขอซ้ำอีกว่า คั่นผู้ใดมาเว้ามาสอนข่าวประเสริฐจอมปลอมให้พวกเจ้าฟัง ที่เพี้ยนไปจากข่าวประเสริฐที่ข้อยเคยบอกสอนพวกเจ้ามาแล้ว กะให้มันถืกพระเจ้าสาปแซ่งเด้อ

1:10 บัดนี้ ข้อยพวมซอกการยอมรับจากคนหรือจากพระเจ้า คือข้อยพวมซอกเอาใจคนบ้อ คั่นข้อยยังซอกเอาใจคน ข้อยบ่สมควรสิเป็นผู้ฮับใซ้ของพระคริสต์เลย

1:11 แต่ว่า พี่น้องเอ้ย ข้อยขอยืนยันว่า ข่าวประเสริฐที่ข้อยได้บอกได้สอนพวกเจ้าฮั่น มันบ่แม่นแนวความคึดตามที่คนตั้งขึ้นมา

1:12 แล้วข้อยบ่ได้ฮับข่าวประเสริฐมาจากผู้ใดเลย บ่มีใผได้สอนได้บอกข้อยดอก แต่ว่าพระเยซูคริสต์เอง เป็นผู้ที่เปิดเผยให้ข้อยฮู้จักทางนิมิตหมาย

1:13 พวกเจ้าเคยได้ยินเถิงประวัติของข้อยอยู่แล้ว ว่าตอนอยู่ในศาสนายิวฮั่น ข้อยได้ซอกข่มเหงกลุ่มผู้เซื่อของพระเจ้าอย่างโหดเหี้ยม จั่งพยายามทำลายให้เมิ้ดไป

1:14 แล้วตอนฮั้น ข้อยได้พัฒนาก้าวหน้าทางศาสนายิวเด่นกว่าหมู่หลายคนในประเทศของข้อย ย้อนว่าข้อยมีใจฮ้อนฮน ได้ปฏิบัติตามฮีตคองประเพณีของพ่อตระกูลอย่างเคร่งครัดกว่าหมู่

1:15 แต่ว่าพอเถิงยามที่พระเจ้าพอใจ ผู้เพิ่นได้เลือกข้อยไว้ตั้งแต่อยู่ในท้องแม่ เพิ่นกะได้เอิ้นได้เซิญข้อยมาโดยทางพระคุณของเพิ่น

1:16 เพื่อสิได้เปิดเผยให้โตข้อยฮู้จักกับพระบุตรของเพิ่น เพื่อให้ข้อยออกไปประกาศต่อพวกคนต่างซาติ แล้วในตอนที่พระเจ้าได้เอิ้นข้อยฮั่น ข้อยบ่ได้ฟ้าวออกไปปรึกษาหารือนำคนดอก

1:17 กับข้อยบ่ได้ขึ้นไปเมืองเยรูซาเล็ม ไปหาพวกทูตพิเศษผู้อื่นๆ ที่เป็นทูตพิเศษก่อนข้อย แต่ข้อยได้เดินทางไปแผ่นดินอาระเบียก่อน แล้วกะได้หลบมายังเมืองดามัสกัสอีก

1:18 แล้วอยู่มาอีกสามปี ข้อยจั่งขึ้นไปเมืองเยรูซาเล็ม เพื่อไปหาเปโตร แล้วกะได้พักอยู่นำลาวสิบห้ามื้อ

1:19 แต่ว่า ตอนฮั้นข้อยบ่ได้พ้อกับพวกทูตพิเศษผู้อื่นๆ นอกจากยากอบ น้องซายขององค์พระเยซูเจ้า

1:20 (บัดนี้ แนวที่ข้อยเขียนมาหาพวกเจ้าหนิ ข้อยขอยืนยันต่อพระเจ้าว่า ข้อยบ่ได้ตัวะเลย)

1:21 อยู่มา ข้อยได้เข้าไปในเขตเมืองซีเรีย กับเขตเมืองซีลีเซีย

1:22 แล้ว กลุ่มผู้เซื่ออยู่เขตเมืองยูเดีย ยังบ่ฮู้จักหน้าของข้อย

1:23 เพียงแต่เขาเคยได้ยินข่าวเรื่องข้อยว่า “ผู้ที่เคยข่มเหงทำลายพวกเฮามาก่อน บัดนี้ เขาพวมประกาศเรื่องความเซื่อฮั่น ที่เขาเคยพยายามทำลายมาก่อน”

1:24 แล้วพวกเขาจั่งได้ยกย่องถวายเกียรติพระเจ้าย้อนโตข้อยหนิ