1:1 จากยากอบ ข้าฮับใซ้ของพระเจ้า กับของพระเยซูคริสต์เจ้านำ เถิงซาวยิวสิบสองตระกูลที่ถืกกระจัดกระจายออกไปฮั้น ให้ชื่นชมยินดีเถิด

1:2 พี่น้องของข้อยเอ้ย ให้ชื่นชมยินดีเถิด บัดพวกเจ้าตกอยู่ในการทดลองแนวต่างๆ

1:3 โดยฮู้กันแล้วว่า การทดลองความเซื่อของเจ้าฮั้น เฮ็ดให้เกิดความอดทนพากเพียร

1:4 แต่ให้ความอดทนพากเพียรของเจ้าฮั้นเถิงผลสำเร็จเด้อ เพื่อพวกเจ้าสิเถิงการดีพร้อมสมบูรณ์แบบ อย่างครบถ้วน บ่ได้ขาดอีหยัง

1:5 คั่นผู้ใดในพวกเจ้าขาดปัญญา กะให้ผู้ฮั้นขอจากพระเจ้า ผู้เพิ่นที่ยินดีให้เมิ้ดคู่คนอย่างเหลือล้นโดยบ่มีติเตียน แล้วเพิ่นกะสิโปรดให้เขาโลด

1:6 แต่ให้ผู้ฮั้นขอด้วยความเซื่อ บ่มีการสงสัยเลย ย้อนว่าผู้ที่สงสัยกะคือปานคลื่นในทะเล ถืกลมพัดซัดไปซัดมา

1:7 คือ อย่าให้เขาคึดว่าสิได้ฮับอีหยังจากองค์พระผู้เป็นเจ้าเลย

1:8 ย้อนว่าคนสองจิตสองใจเป็นคนบ่มั่นคงในคู่ทางของเขาฮั้น

1:9 ฝ่ายพี่น้องผู้ยากจนที่อยู่ในฐานะต่ำ ให้เขาชื่นชมยินดี ที่เขาถืกยกย่องเซิดซู

1:10 แต่ฝ่ายพี่น้องผู้ฮั่งมีที่อยู่ในฐานะสูง กะให้เขาชื่นชมยินดีบัดถืกเหยียดยามให้ต่ำลง ย้อนว่าเขาสิผ่านพ้นไปคือปานดอกหญ้ากลางท่งนา

1:11 ย้อนว่า บัดตะเว็นขึ้นมาส่องแดดฮ้อนๆ หญ้าฮั้นกะสิเหี่ยวแห้งไป แล้วดอกหญ้าฮั้นกะสิผ่านพ้นไปนำ แล้วความงามของมันกะสิสูญสิ้นไปนำ คนฮั่งมีกะคือกัน เขากะสิผ่านพ้นไปตามทางของเขาคือกัน

1:12 แล้วผู้ที่ทนเอาได้ต่อการทดลองกะได้พรเป็นสุข คือว่า บัดเขาทนได้แล้ว เขากะสิได้ฮับมงกุฎแห่งซีวิต ซึ่งองค์พระผู้เป็นเจ้าได้สัญญาไว้ว่าสิมอบให้ผู้ที่ฮักเพิ่น

1:13 แล้วอย่าให้ผู้ใดผู้หนึ่งหาเว้าว่า “พระเจ้าหลอกล่อข้อยให้หลง” ย้อนว่าพระเจ้าบ่สามารถถืกการหลอกล่อให้หลง กับเพิ่นบ่เคยหลอกล่อผู้ใดให้หลงเลย

1:14 แต่ว่า คู่คนกะถืกหลอกล่อ บัดตัณหาของโตเขาเองชักนำให้หลง แล้วโตเขากะหลงไปตามฮั้น

1:15 บัดตัณหาพุ่งโตขึ้นแล้ว กะเฮ็ดให้เกิดเป็นบาป แล้วบัดบาปฮั้นเถิงเต็มที่แล้ว มันกะนำไปสู่ความตาย

1:16 พี่น้องที่ฮักของข้อยเอ้ย อย่าหลงเข้าใจผิดเด้อ

1:17 แนวดีงามกับแนวยอดเยี่ยมคู่อย่างย่อมมาจาก สวรรค์ ลงมาจากพระเจ้าผู้เป็นพ่อของควงสว่างทั้งหลาย ซึ่งเพิ่นผู้ฮั้นบ่มีการเปลี่ยนแปลง ปานเงาที่หมุนเวียนเปลี่ยนไป

1:18 แล้วพระเจ้าให้พวกเฮาเกิดใหม่โดยพระคำแห่งความจริง ตามพระประสงค์ของเพิ่น เพื่อพวกเฮาสิได้เป็นโตอย่างของผลแรกในแนวที่เพิ่นสร้างฮั้น

1:19 จั่งซั้น พี่น้องที่ฮักของข้อยเอ้ย ให้คู่คนไวในการฟัง ซ้าในการเว้า กับซ้าในการฮ้าย

1:20 ย้อนว่าการฮ้ายของคนบ่เป็นเหตุให้เกิดความชอบธรรมของพระเจ้า

1:21 จั่งซั้น ให้ถอดถิ้มแนวสกปรกลามกคู่อย่าง กับแนวซั่วฮ้ายอันล่วงเกิน แล้วฮับเอาพระคำฮั้นที่ปลูกไว้ในใจด้วยความนอบน้อมเด้อ ซึ่งสามารถเฮ็ดให้จิตใจของพวกเจ้ารอดพ้นได้

1:22 แต่ให้เป็นผู้ปฏิบัติตามพระคำฮั้น บ่แม่นเพียงแต่เป็นผู้ฟังเอาซื่อๆ ซึ่งเป็นการหลอกลวงโตเอง

1:23 ย้อนว่า คั่นผู้ใดฮับฟังพระคำ แล้วบ่ได้ปฏิบัติตาม ผู้ฮั้นคือปานคนเบิ่งหน้าของโตเองในกระจกซื่อๆ

1:24 คือ คนแบบฮั้นเบิ่งโตเองแล้วกะออกไปซื่อๆ แล้วบิดเดี๋ยวกะลืมว่าสภาพโตเป็นจั่งใด

1:25 แต่ฝ่ายผู้ที่พิจารณาเบิ่งในกฎบัญญัติแห่งเสรีภาพอันดีเลิศฮั้น แล้วจั่งดำรงอยู่ในฮั้น ผู้ฮั้นบ่ได้เป็นแต่ผู้ฮับฟังแล้วหลงลืม แต่เป็นผู้ปฏิบัติตามการงาน แล้วเขาผู้นี้สิได้พรเป็นสุขในการของตน

1:26 คั่นผู้ใดในพวกเจ้า ถือว่าเคร่งครัดในทางนมัสการ แล้วบ่ได้ยับยั้งลิ้นของโตไว้ แต่หลอกใจของโตเอง การนมัสการของผู้ฮั้นกะบ่มีประโยชน์อีหยัง

1:27 โดยว่า การนมัสการที่บริสุทธิ์ บ่มีมลทินต่อหน้าพระเจ้าผู้เป็นพ่อ กะคือ การเยี่ยมยามซ่อยลูกกำพร้าผู้บ่มีพ่อ กับญิงม่ายผู้เป็นทุกข์เป็นฮ้อน กับการฮักษาโตให้พ้นจากแนวที่พาเป็นมลทินฝ่ายโลกนี้