1:1 จาก ยูดา ผู้เป็นข้าฮับใซ้ของพระเยซูคริสต์ กับเป็นน้องซายของยากอบ เรียน คนทั้งหลายที่พระเจ้าผู้เป็นพ่อได้เอิ้นได้เซิญมา ได้ซำระล้างตั้งให้เป็นผู้บริสุทธิ์ ซึ่งได้คุ้มครองฮักษาโดยในพระเยซูคริสต์

1:2 ขอความเมตตา สันติภาพ กับความฮักเพิ่มทวีหลายขึ้นต่อพวกเจ้าเถิด

1:3 พี่น้องที่ฮักทั้งหลายเอ้ย ตอนที่ข้อยอุตส่าห์เขียนมายังพวกเจ้าในเรื่องความรอดพ้นของพวกเฮานี้ ข้อยจั่งเห็นว่าจำเป็นที่สิต้องเขียนมาขอร้องว่า พวกเจ้าควรใส่ใจในการต่อสู้เพื่อความเซื่อ ซึ่งได้ฮับการมอบไว้ให้กับพวกคนของพระเจ้าทั้งหลายมาแล้ว

1:4 ย้อนว่า มีผู้ลางคนได้แอบแฝงเข้ามาอย่างบ่ฮู้เมื่อโต ซึ่งแม่นพวกนี้ที่มันถืกหมายไว้แต่โดนแล้วว่า สิต้องถืกการพิพากษาลงโทษจั่งซี้ เป็นคนบ่เป็นธรรม ที่ได้บิดเบือนพระคุณของพระเจ้าของเฮา ให้กลายเป็นการซั่วช้าลามก กับปฏิเสธองค์พระผู้เป็นเจ้า ผู้เป็นพระเจ้าแต่ผู้เดียว กับปฏิเสธองค์พระเยซูคริสต์เจ้าของเฮานำ

1:5 ข้อยอยากเตือนความจำให้พวกเจ้า เถิงแม้นว่าพวกเจ้าเคยรู้เรื่องนี้มาแล้ว คือ องค์พระผู้เป็นเจ้าได้โปรดซ่อยคนของเพิ่นให้รอดจากแผ่นดินอียิปต์ในสมัยก่อนฮั้น อยู่มาเพิ่นกะได้ทำลายคนพวกฮั้นที่บ่ยอมเซื่อ

1:6 แล้วฝ่ายหมู่เทวทูตฮั้น ที่บ่ได้ฮักษาสภาพบริสุทธิ์อันดั้งเดิมของเขา แต่ได้ปะถิ้มฐานะเดิมของเขาฮั้น เพิ่นได้จองจำพวกเขาไว้ด้วยโซ่ตรวนตลอดนิรันดร์ ขังไว้ในหม่องมืดจนกว่าสิฮอดการพิพากษาในมื้อสำคัญอันยิ่งใหญ่ฮั้น

1:7 แล้วแม้นแต่เมืองโสโดม เมืองโกโมราห์ กับเมืองต่างๆ ที่อยู่ล้อมรอบ ที่ได้ล่วงไปในการมัวเมาฮ่วมเพศในกามราคะตัญหา พระเจ้าได้ตั้งไว้เป็นโตอย่างของการที่สิต้องได้ฮับโทษอันฮ้ายแฮงในไฟนิรันดร์

1:8 ในทำนองเดียวกัน พวกคนเพ้อฝันแต่เรื่องสกปรกโสมมฮั้น คนแนวนี้เป็นมลทินทั้งโต ดูหมิ่นผู้มีอำนาจ กับเว้าใส่ร้ายต่อผู้มีบรรดาศักดิ์

1:9 แม้นแต่มีคาเอล ผู้เป็นเทวทูตสูงสุดฮั้น ตอนลาวขัดแย้งกันกับพญามารเรื่องศพของโมเสส ลาวเองกะยังบ่กล้าที่สิว่ากล่าวพญามารเลย แต่เพียงบอกมันว่า “ให้องค์พระผู้เป็นเจ้าว่ากล่าวเจ้าเถิด”

1:10 แต่ว่าคนพวกนี้ได้เว้าใส่ร้ายเถิงแนวใดๆ ที่เขาบ่ฮู้ เว้าอย่างฮู้เท่าบ่เถิงการ จั่งเว้าตามความโง่โดยสัญชาตญาณของโตเอง คือปานสัตว์เดียรัจฉานที่บ่มีความคึด เขาจั่งเฮ็ดให้โตเองเสื่อมทรามลงไปด้วยการที่เขาเองได้เว้าฮั้น

1:11 ฉิบหายแล้ว พวกหนิ ย้อนเขาไปนำทางของท้าวคาอินฮั้นเอง กับได้มั่วแต่แล่นไปตามทางผิดพลาดของ บาลาอัม ย้อนขี้โลภเห็นแก่ได้ แล้วจั่งพินาศไปในทางกบฏของโคราห์

1:12 คนพวกนี้เป็นแป้วเป็นจุดด่างในงานกินเลี้ยงสามัคคีของพวกเจ้า บัดยามเขาฮ่วมกันกับพวกเจ้าฮั้น กะบ่มีการเกรงใจเลย สนใจแต่โตเอง พวกนี้คือปานเมฆบ่มีฝน ถืกพัดไปพัดมา ตามกระแสลม คือปานกกไม้ที่บ่ออกผลในยามเก็บเกี่ยว ตายแล้วตายอีก ถืกลกออกมาทั้งฮาก

1:13 คือปานคลื่นทะเลที่ซัดไปซัดมาอย่างรุนแรง เกิดเป็นฟองขึ้นมาในการละอายของเขาเอง เขาคือปานดาวที่หลงทาง ซึ่งมีแต่แดนมืดจองไว้สำหรับเขาอยู่ตลอดกาลเลย

1:14 แล้ว ส่วนท้าวเอโนคในสมัยก่อน ซ่วงลูกหลานคนที่เจ็ดนับแต่พ่ออาดัมมา กะได้พยากรณ์เถิงคนพวกนี้นำ ว่า “นี่แน่ะ องค์พระผู้เป็นเจ้าสิได้ลงมาพร้อมคนบริสุทธิ์ของเพิ่นเป็นสิบๆ หมื่น

1:15  มาเพื่อพิพากษาลงโทษคนทั้งปวง ให้พวกคนซั่วที่บ่เคารพพระเจ้า ซึ่งอยู่ในระหว่างพวกพี่น้อง ให้เขาฮู้เมื่อโตในแนวซั่วที่เขาเฮ็ดในทางบ่เป็นธรรมของเขา พร้อมทั้งการหยาบคายทั้งเมิ้ดที่พวกคนบาปซั่วได้เว้าในการลบหลู่พระเจ้า”

1:16 คนพวกนี้เป็นแต่คนจ่ม คนด่า ดำเนินตามทางราคะตัณหาของโตเอง ปากของเขามีแต่อวดอ้างใหญ่โตในแนวต่างๆ ประจบประแจงเว้าดีให้ผู้อื่นเพื่อหวังผลประโยชน์โตเอง

1:17 แต่ว่า พี่น้องที่ฮักเอ้ย ให้จดจำพิจารณาถ้อยคำที่พวกทูตพิเศษขององค์พระเยซูคริสต์เจ้าได้เว้ามาก่อนฮั้นเด้อ

1:18 ที่ว่า พวกเขาได้บอกพวกเจ้าว่า ในยุคสุดท้ายที่สิมา สิมีคนเยาะเย้ยเกิดขึ้น เขาเป็นคนที่ดำเนินตามตัณหาอันซั่วของโตเอง

1:19 คนพวกนี้คือประเภทที่มักเฮ็ดตามโลกีย์วิสัย ก่อการแตกแยกกัน ย้อนบ่มีพระวิญญาณอยู่ในโตเขาเลย

1:20 แต่พี่น้องที่ฮักเอ้ย พวกเจ้าควรสิเสริมสร้างโตเองขึ้นในความเชื่ออันบริสุทธิ์ยิ่งของพวกเจ้า จั่งอธิษฐานเว้านำพระเจ้าด้วยอาศัยพระวิญญาณ

1:21 แต่ฝ่ายพวกเจ้า ให้ฮักษาโตเองไว้ในความฮักของพระเจ้าเด้อ ในขณะที่ถ้าฮับความเมตตาขององค์พระเยซูคริสต์เจ้าของเฮา เถิงซีวิตนิรันดร์

1:22 แล้วให้แสดงความเมตตาให้ผู้ลางคนเด้อ โดยอาศัยการพิจารณาแต่ละคน

1:23 และซ่อยให้คนอื่นรอดพ้นโดยความยำเกรง คือปานลากโตเขาออกจากไฟ จั่งชังแม้นแต่เสื้อผ้าที่เปื้อนเป็นมลทินด้วยเนื้อหนังของเขา

1:24 บัดนี้ แด่เพิ่นผู้สามารถคุ้มครองฮักษาพวกเจ้าไว้ บ่ให้สะดุดล้มลงเลย แล้วสามารถมอบพวกเจ้าไว้อย่างดีพร้อม ด้วยความปิติยินดีอย่างเหลือล้นต่อหน้าพระเจ้าผู้ประกอบด้วยพระสิริ

1:25 ขอพระสิริ พระบารมี การครอบครอง กับ ฤทธานุภาพ มีแด่พระเจ้า พระผู้โปรดของพวกเฮา ผู้ประกอบด้วยพระปัญญาอันแตกฉานแต่ผู้เดียว ในปัจจุบัน พร้อมทั้งตลอดกาลเป็นนิตย์ อาเมน