2:1 บัดยามพระเยซูได้เกิดอยู่บ้านเบธเลเฮมแคว้นยูเดียในรัชกาลของกษัตริย์เฮโรดฮั้น นี่แน่ะ อยู่มามีพวกนักปราชญ์จากทางตะเว็นออก ได้เดินทางมายังเมืองเยรูซาเล็ม

2:2 มาถามเฮโรดว่า “เด็กน้อยที่เกิดมาเป็นกษัตริย์ของซนซาติยิวฮั้นอยู่ใส คือเฮาได้เห็นดาวของเพิ่นอยู่เทิงฟ้าในทางตะเว็นออก พวกเฮาจั่งมาหวังสิเคารพบูซาเพิ่น”

2:3 บัดพอกษัตริย์เฮโรดได้ยินจั่งซั้นแล้ว ใจเขากะวุ่นวาย พร้อมทั้งเมิ้ดคู่คนในเมืองเยรูซาเล็ม

2:4 แล้วพอบัดกษัตริย์เฮโรดได้เอิ้นคณะหัวหน้าผู้นำเครื่องถวายเมิ้ดคู่คน พร้อมทั้งพวกเสมียนฯฮั้นที่มาจากประชาชนมาโฮมกัน แล้วลาวจั่งได้ถามพวกเขาว่า ผู้เป็นพระคริสต์ฮั้นสิเกิดอยู่ใส

2:5 พวกเขาเลยบอกเฮโรดว่า “ซิเกิดอยู่บ้านเบธเลเฮมแคว้นยูเดีย ย้อนว่ามีผู้เป็นปากเป็นเสียงของพระเจ้าได้เขียนไว้จั่งซี้

2:6 ว่า ‘บ้านเบธเลเฮมในแผ่นดินยูเดียเอ้ย แม้นว่าเจ้าเป็นหมู่บ้านเล็กน้อยที่สุด ในพวกผู้ครอบครองของยูเดียทั้งเมิ้ด จังใดกะตาม สิมีผู้ปกครอง ผู้ยิ่งใหญ่สำคัญ ผู้หนึ่ง ที่สิออกมาจากเจ้า เป็นผู้ที่สิปกครองคนอิสราเอล ซนซาติของเฮาฮั้น’”

2:7 หลังจากฮั้น เฮโรดจั่งเชิญพวกนักปราชญ์เข้ามาเป็นการลับ สอบถามเขาอย่างถี่ถ้วนเถิงยามที่ดาวฮั้นได้ปรากฏขึ้น

2:8 แล้วเฮโรดได้ให้พวกนักปราชญ์ไปบ้านเบธเลเฮมสั่งไว้ว่า “ให้ไปซอกหาเด็กน้อยฮั้นเด้อ บัดพ้อแล้วให้หลบคืนมาแจ้งเฮา เพื่อเฮาสิได้ไปเคารพบูซาผู้ฮั้นนำ”

2:9 บัดพวกเขาได้ฟังกษัตริย์แล้ว เขากะได้ออกไป แล้วนี่แน่ะ ดาวซึ่งเขาได้เห็นในทางตะเว็นออกฮั้นกะได้นำหน้าเขาไปก่อน จนมาอยู่เทิงหม่องที่เด็กน้อยอยู่ฮั้น

2:10 บัดพวกนักปราชญ์ได้เห็นดาวฮั้นแล้ว เขากะดีอกดีใจอย่างเหลือล้น

2:11 แล้วบัดพวกเขาเข้าไปในเฮือน พอได้เห็นเด็กน้อยกับนางมารีย์ผู้เป็นแม่แล้ว จั่งกราบนมัสการเด็กน้อยฮั้น แล้วได้เอาทรัพย์สมบัติของเขาออกมา เป็นของฝาก คือ ทองคำ กำยาน กับมดยอบ ถวายบูชาเด็กน้อย

2:12 แล้วพวกนักปราชญ์ พอได้ฮับคำเตือนจากพระเจ้าในความฝัน ว่าบ่ให้กลับไปหาเฮโรด เขาเลยกลับเมือบ้านของเขาโดยทางอื่น

2:13 บัดเขาเดินทางออกไปแล้ว นี่แน่ะ เทวทูตขององค์พระผู้เป็นเจ้าได้มาปรากฎอยู่ต่อหน้าโยเซฟในความฝัน บอกว่า “ให้ลุกขึ้นพาเด็กน้อยกับแม่หนีไปประเทศอียิปต์เดี๋ยวนี้ แล้วให้คอยถ้าอยู่ฮั้นจนกว่าเฮาสิบอกเจ้า ย้อนว่าเฮโรดสิซอกหาเด็กน้อยฮั้นเพื่ออยากสิฆ่าสิทำร้าย”

2:14 แล้วในยามกลางคืน โยเซฟจั่งลุกขึ้นพาเด็กน้อยกับแม่ เดินทางออกไปยังประเทศอียิปต์

2:15 แล้วกะอยู่ฮั้นจนฮอดเฮโรดตาย แนวหมู่นี้ได้เกิดขึ้นเพื่อสิให้เป็นไปตามพระคำขององค์พระผู้เป็นเจ้าซึ่งผู้เป็นปากเป็นเสียงของเพิ่นได้เว้าไว้ว่า “เฮาได้เอิ้นลูกซายของเฮาออกมาจากประเทศอียิปต์”

2:16 พอบัดเฮโรดเห็นว่าพวกนักปราชญ์เว้าหยอกเล่นกับลาว กะอยากฮ้ายอย่างใหญ่ จั่งสั่งให้ออกไปฆ่าเด็กในบ้านเบธเลเฮมกับหม่องใกล้เคียงให้ตายทั้งเมิ้ดบ่ให้เหลือ ตั้งแต่อายุสองปีลงมา ซึ่งพอดีกันกับยามที่เฮโรดได้สอบถามพวกนักปราชญ์แต่ตำอิดฮั้น

2:17 ฮั้นกะเป็นไปตามพระคำของพระเจ้าที่เว้าโดยเยเรมีย์ผู้เป็นปากเป็นเสียงของเพิ่นว่า

2:18 “ในหมู่บ้านรามาห์ฮั้นกะได้ยินเสียงฮ้องไห้เสียใจกับโศกเศร้าอย่างขนาด คือเป็นเสียงของนางราเชลฮ้องไห้ย้อนลูกๆ ของนาง นางจั่งบ่ยอมฮับการเล้าโลมปลอบใจ ย้อนว่าลูกทั้งหลายฮั้นบ่มีแล้ว”

2:19 แต่นี่แน่ะ บัดเฮโรดตายแล้ว เทวทูตองค์หนึ่งขององค์พระผู้เป็นเจ้า ได้มาปรากฏในความฝันของโยเซฟที่ประเทศอียิปต์

2:20 สั่งว่า “ให้ลุกขึ้นพาเด็กน้อยกับแม่หลบไปยังแผ่นดินอิสราเอล ย้อนว่าพวกคนที่ซอกหาซีวิตของเด็กน้อยฮั้นได้ตายไปแล้ว”

2:21 โยเซฟจั่งลุกขึ้นพาเด็กน้อยกับแม่ พาเมือแผ่นดินอิสราเอล

2:22 แต่บัดพอได้ข่าวว่า อารเคลาอัส ผู้เป็นลูกของเฮโรด ครอบครองอยู่แคว้นยูเดียแทนพ่อ กะเกิดหย้านที่สิไปอยู่ฮั้น จั่งอ้อมไปทางแคว้นกาลิลีตามคำเตือนจากพระเจ้าที่ได้ฮับในความฝัน

2:23 แล้วพอมาฮอดเมืองหนึ่งชื่อว่า นาซาเร็ธ ลาวกะตั้งหลักตั้งฐานอยู่ฮั้น กะเพื่อสิเป็นไปตามพระคำของพระเจ้าซึ่งพวกผู้เป็นปากเป็นเสียงของเพิ่นได้เว้าไว้ว่า “เขาสิเอิ้นเพิ่นว่าซาวนาซาเร็ธ”