4:1 หว่างฮั้นพระวิญญาณได้นำพระเยซูเข้าไปในถิ่นแห้งแล้ง เพื่อสิถืกผีมารซาตานทดลอง

4:2 กับบัดเพิ่นได้อดข้าวปลาอาหารสี่สิบมื้อสี่สิบคืนแล้ว เพิ่นกะหิวอยากกิน

4:3 ผีมารซาตาน ผู้ทดลองฮั้น เลยมาหาเพิ่น เสนอว่า “คั่นเจ้าเป็นพระบุตรของพระเจ้าอีหลี กะให้สั่งก้อนหินแนวหมู่นี้ให้เป็นก้อนขนมปังถะแม่ะ”

4:4 ส่วนพระเยซูกะตอบว่า “มีข้อเขียนไว้ ในพระคำ แล้วว่า ‘คนสิบ่ได้เลี้ยงซีวิตด้วยอาหารการกินแนวเดียว แต่ด้วยเมิ้ดคู่คำที่ออกมาจากปากของพระเจ้า’”

4:5 แล้วผีมารซาตานได้นำพระเยซูขึ้นไปยังนครบริสุทธิ์ (คือเมืองเยรูซาเล็ม) แล้ว ตั้งให้เพิ่นอยู่เทิงยอดแหลมหลังคาพระวิหาร

4:6 แล้วเสนอต่อเพิ่นอีกว่า “คั่นเจ้าเป็นพระบุตรของพระเจ้าอีหลี ให้เจ้าโดดลงไปถะแม่ะ ย้อนมีข้อเขียนไว้ ในพระคำ แล้วว่า ‘พระเจ้าสิสั่งพวกเทวทูตของเพิ่นให้เบิ่งแยง ยกซูเจ้าไว้ในมือ เพื่อบ่ให้เท้าของเจ้าตำก้อนหินจักเทื่อ’”

4:7 พระเยซูจั่งตอบมันซ้ำอีกว่า “มีข้อเขียนไว้ในพระคำอีกว่า ‘อย่าทดลององค์พระผู้เป็นเจ้า ผู้เป็นพระเจ้าของเจ้าเด้อ’”

4:8 ต่อมา ผีมารซาตานได้นำพระเยซูขึ้นไปเทิงหลังภูเขาสูงๆ แล้วจั่งซี้ให้เบิ่งอาณาจักรเมิ้ดคู่หม่องอยู่ทั่วแผ่นดินโลก ทั้งศักดิ์ศรีของมันให้เพิ่นได้เห็น

4:9 แล้วมันจั่งเสนอต่อเพิ่นอีกว่า “คั่นเจ้าสิกราบลงเคารพบูซาเฮา เฮากะสิมอบเมิ้ดคู่อันคู่แนวทั้งปวงแนวหมู่นี้ให้เจ้าโลด”

4:10 พระเยซูจั่งตอบมันว่า “อ้ายผีมารซาตาน ให้มึงออกไปให้พ้นเด้อ ย้อนมีข้อเขียนไว้ ในพระคำ แล้วว่า ‘ให้เคารพบูซาองค์พระผู้เป็นเจ้า ผู้เป็นพระเจ้าของเจ้า กับปรนนิบัติฮับใซ้เพิ่นแต่ผู้เดียว’”

4:11 แล้วผีมารซาตานจั่งออกจากพระเยซูไป แล้วนี่แน่ะ มีหมู่เทวทูตมาปรนนิบัติฮับใซ้เพิ่น

4:12 บัดพอพระเยซูได้ยินว่าโยฮันผู้ให้ฮับพิธีจุ่มน้ำ ได้ถืกขังไว้อยู่ในคุก เพิ่นกะได้ออกไปยังแคว้นกาลิลี

4:13 บัดออกจากเมืองนาซาเร็ธแล้ว เพิ่นกะเข้าเมืองคาเปอรนาอุม ซึ่งอยู่ฮิมทะเล ในเขตแดนเศบูลุนกับนัฟทาลี

4:14 อันนี้กะเพื่อสิเป็นไปตามพระคำของพระเจ้า ซึ่งเว้าไว้โดยอิสยาห์ ผู้เป็นปากเป็นเสียงของพระเจ้า

4:15 ว่า “ฝ่าย แคว้นเศบูลุน กับ แคว้นนัฟทาลี ทางข้างทะเลฟากแม่น้ำจอร์แดนฝั่งพู้น คือกาลิลีของพวกคนต่างซาติ

4:16 คือหมู่พวกคนที่นั่งอยู่ในความมืดฮั้น เขาได้เห็นความสว่างใหญ่อันแสนสำคัญแล้ว แล้วฝ่ายพวกคนผู้ที่นั่งอยู่ในแดนเงาของความตายฮั้น กะมีแสงสว่างเกิดขึ้นส่องให้เขาแล้ว”

4:17 ตั้งแต่ฮั้นมา พระเยซูได้ตั้งต้นประกาศว่า “ให้กลับใจใหม่เด้อ ย้อนว่าแผ่นดินสวรรค์ใกล้สิมาฮอดแล้ว”

4:18 แล้วบัดพระเยซูพวมย่างตามซายทะเลกาลิลี กะเหลียวเบิ่งเห็นสองพี่น้อง คือซีโมนที่เอิ้นว่าเปโตร กับอันดรูว์น้องซายของเขา พวมขว้างแหอยู่ในทะเล ย้อนว่าเขามีอาซีพหาปลา

4:19 พระเยซูจั่งเว้ากับเขาว่า “ให้ตามเฮามาเด้อ แล้วเฮาสิให้เป็นผู้หาคนแทนหาปลา”

4:20 เขาทั้งสองได้ปะอวนไว้ แล้วตามพระเยซูไปโลด

4:21 แล้วพอเพิ่นย่างไปต่อ กะเหลียวเบิ่งเห็นสองพี่น้องอีกพวกหนึ่ง คือยากอบ ลูกซายเศเบดี กับ ยอห์น น้องซายของเขา พวมชุนอวนอยู่ในเฮือกับเศเบดีพ่อของเขา พระเยซูจั่งได้เอิ้นเขาให้ตามเพิ่นไปนำ

4:22 แล้วในยามฮั้นพอดี เขาทั้งสองกะปะเฮือกับลาพ่อ ตามพระเยซูไปคือกัน

4:23 แล้วพระเยซูได้ไปล้อมรอบทั่วแคว้นกาลิลี สอนในศาลาธรรมของเขาอยู่ฮั้น จั่งได้ประกาศข่าวดีอันประเสริฐเรื่องแผ่นดินของพระเจ้า กับได้ปัวโรคภัยไข้เจ็บเมิ้ดคู่แนวของซาวเมืองให้ดีให้เซา

4:24 แล้วซื่อเสียงของพระเยซูกะเลื่องลือไปฮอดทั่วประเทศซีเรีย ซาวบ้านซาวเมืองจั่งพาพวกคนป่วยเป็นโรคต่างๆ กับคนที่ทนทุกข์ทนยาก กับคนที่ถืกวิญญาณซั่วครอบงำ กับคนบ้าที่บ่มีสติ กับคนเป็นอัมพาต มาหาพระเยซู เพิ่นกะได้ปัวเขาให้ดีให้เซา

4:25 แล้วมีคนกลุ่มใหญ่มาจากแคว้นกาลิลี กับแคว้นทศบุรี กับเมืองเยรูซาเล็ม กับแคว้นยูเดีย กับแม่น้ำจอร์แดนฟากพู้น ได้ติดตามเพิ่นไป