15:1 หว่างฮั้น พวกเสมียนฯกับพวกฟาริสี ซึ่งมาจากเมืองเยรูซาเล็ม มาถามพระเยซูว่า

15:2 “เป็นหยังพวกลูกศิษย์ของเจ้าจั่งละเมิดประเพณีที่สืบทอดมาจากพวกพ่อตระกูลของไทเฮา คือเขาบ่ได้ล้างมือก่อนกิน”

15:3 แต่พระเยซูได้ตอบเขาว่า “แล้วเป็นหยังพวกเจ้าจั่งละเมิดกฎบัญญัติของพระเจ้าด้วยประเพณีของพวกเจ้าเอง

15:4 คือ พระเจ้าได้สั่งไว้ว่า ‘ให้เกียรติพ่อแม่ของโต’ แล้ว ‘ผู้ใดแช่งด่าพ่อแม่ของโต ผู้ฮั้นต้องถืกลงโทษเถิงตาย’

15:5 แต่พวกเจ้าหนิกลับสอนกันว่า ‘ผู้ใดที่สิบอกพ่อแม่ว่า “แนวใดของผู้ข้าที่อาจเป็นประโยชน์ให้พ่อแม่ แนวฮั้นกะเป็นของถวายพระเจ้าแล้ว”

15:6 ผู้ฮั้นบ่จำเป็นสิให้เกียรติพ่อแม่ของโต’ การที่พวกเจ้าสอนจั่งซั้น กะเฮ็ดให้กฎบัญญัติของพระเจ้าจืดจางไป บ่มีประโยชน์อีหยัง ตามประเพณีของพวกเจ้าหนิ

15:7 โอ้ พวกหน้าซื่อใจคดเอ้ย ผู้เป็นปากเป็นเสียงอิสยาห์ได้เว้าถืกต้องพอแฮงแล้วเถิงพวกเจ้าหนิ

15:8 ว่า ‘คนพวกนี้เข้ามาใกล้เฮาด้วยขี้ปากของเขา กับให้เกียรติเฮาแต่ขี้สบของเขาซื่อๆ แต่ว่าจิตใจของเขาห่างไกลจากเฮาอย่างไกลลิบ

15:9 คือการที่เขาพวกนี้เคารพบูซาเฮากะไร้สาระ คือเขาเอาบทสอนของคนมาอ้างว่าเป็นหลักคำสอน ของพระเจ้า ’”

15:10 เว้าแล้วพระเยซูกะเอิ้นพวกคนหลวงหลายอยู่ฮั้นมา แล้วได้บอกเขาว่า “ให้ฟังเอากับเข้าใจเด้อ

15:11 แนวใดที่เข้าไปในปาก กะบ่ได้พาเฮ็ดให้คนเป็นมลทินดอก แต่แนวที่ออกมาจากปากฮั้นล่ะ เป็นแนวที่พาเฮ็ดให้คนเป็นมลทิน”

15:12 ยามฮั้น พวกลูกศิษย์มาเว้ากับเพิ่นว่า “ท่านฮู้บ้อว่า บัดพวกฟาริสีได้ยินคำเว้าฮั้น เขากะสะดุดบ่พอใจเลย”

15:13 พระเยซูจั่งตอบว่า “กกไม้ใดที่พระเจ้าผู้เป็นพ่อของเฮา (ผู้เพิ่นสถิตในสวรรค์) บ่ได้ปลูก กกฮั้นสิต้องถืกถอนออกเมิ้ดทั้งฮาก

15:14 อย่าลำไลพวกเขาเลย คือพวกนี้เป็นคนตาบอดจูงคนตาบอดไป คือว่า คั่นคนตาบอดจูงคนตาบอด เขาทั้งสองสิมีแต่พากันตกคลองเอาโลด”

15:15 ฝ่ายเปโตรได้ขอเพิ่นว่า “ซ่อยอธิบายคำเปรียบเทียบนี้ให้พวกผู้ข้าฮู้จักนำแหน่”

15:16 ส่วนพระเยซูเลยตอบว่า “พวกเจ้ายังขาดความเข้าใจบ้อ

15:17 คือพวกเจ้ายังบ่ทันเข้าใจดี ว่าอีหยังๆ ที่เข้าไปในปากกะกลืนลงในท้อง แล้วกะถ่ายออกไป

15:18 แต่แนวที่ออกจากปากฮั้น กะต้องออกมาจากใจซะก่อน แนวฮั้นล่ะได้เฮ็ดให้คนเป็นมลทิน

15:19 คือแนวฮั่นที่ออกมาจากใจของคน มีแต่ความคึดซั่วฮ้าย คือการฆ่า การผิดผัวผิดเมีย การเล่นซู้ล่วงประเวณี การลักขโมย การเป็นพยานเท็จ การเว้าหมิ่นประมาท

15:20 สิ่งแนวหมู่นี้ล่ะ เป็นแนวที่เฮ็ดให้คนเป็นมลทิน แต่ว่าการกินโดยบ่ล้างมือก่อน ส่ำนี้บ่ได้เฮ็ดให้คนเป็นมลทินดอก”

15:21 เว้าแล้วพระเยซูได้ออกจากหม่องฮั้น เข้าไปทางเขตเมืองไทระกับเมืองไซดอน

15:22 แล้วนี่แน่ะ มีญิงซาวคานาอันคนหนึ่งมาจากเขตแดนฮั้น ฮ้องวอนขอเพิ่นว่า “โอ้ พระเยซูผู้เพิ่นเป็นลูกดาวิดเจ้าข้า ขอโปรดเมตตาผู้ข้าท้อน คือลูกสาวของผู้ข้าถืกผีเข้าครอบงำไว้อยู่ เป็นทุกข์เป็นยากหลายขนาด”

15:23 ส่วนพระเยซูกะบ่ได้ตอบเขาจักคำเลย ฝ่ายพวกลูกศิษย์ของเพิ่นได้ขอนำเพิ่นว่า “ไล่นางนี้ออกไปซะ ย้อนเขามีแต่ฮ้องแบบนี้ตามพวกเฮามา”

15:24 แต่พระเยซูตอบว่า “เฮาบ่ได้ฮับการใซ้มาเพื่อหาซาติอื่นๆ นอกจากแกะหลงทางของพี่น้องซาวอิสราเอลท่อฮั้น”

15:25 ฝ่ายแม่ญิงฮั้นกะมากราบมาไหว้พระเยซูเว้าว่า “ท่านเจ้าข้า ขอซ่อยผู้ข้าแหน่ท้อน”

15:26 แต่เพิ่นตอบนางว่า “มันบ่สมควรแล้ว ที่สิเอาแนวกินของลูกๆ โยนลงให้หมากินดอก”

15:27 แล้วแม่ญิงฮั้นตอบฮับว่า “แม่นความอยู่ ท่านเจ้าข้า แต่ตามหลักแล้ว หมากินของเดนที่ตกจากโต๊ะของนายเฮือนบ่แม่นตี่”

15:28 บัดนี้พระเยซูตอบนางว่า “โอ้ ญิงเอ้ย เจ้ามีความเซื่อหลายอีหลี ให้เป็นไปตามความปรารถนาของนางเด้อ” แล้วลูกสาวของนางได้เซาเป็นดีแต่โมงฮั้นมา

15:29 แล้วพระเยซูได้ออกจากหม่องฮั้น มาทางทะเลกาลิลี แล้วขึ้นไปเทิงภูเขา นั่งลงอยู่ฮั้น

15:30 แล้วมีคนหลวงหลายได้มาหาเพิ่น ได้พาคนง่อย คนตาบอด คนปากกืก คนพิการ กับเป็นแนวอื่นๆ อีกหลายแนว มาวางลงต่อหน้าพระเยซู แล้วเพิ่นได้ปัวเขาให้เซาเป็นดีเมิ้ด

15:31 พวกคนอยู่ฮั้นจั่งแปลกใจเป็นตางึดหลายบัดเห็นคนปากกืกเว้าได้ คนพิการเซาเป็นคนแข็งแฮงดี คนง่อยย่างได้สบาย คนตาบอดเห็นได้ แล้วเขาจั่งสรรเสริญพระเจ้าของซนซาติอิสราเอลฮั้น

15:32 ส่วนพระเยซูกะเอิ้นพวกลูกศิษย์ของเพิ่นมาบอกว่า “เฮาอิตนคนหลวงหลายพวกนี้ ย้อนเขาติดตามเฮามาฮอดสามมื้อแล้ว แล้วเขาบ่มีแนวสิกิน เฮาเลยบ่อยากส่งเขาเมือบัดยังอดหิว หย้านว่าเขาสิเมิ้ดแฮงตามทาง”

15:33 พวกลูกศิษย์เลยเว้ากับเพิ่นว่า “ในถิ่นแห้งแล้งนี้ พวกผู้ข้าสิหาแนวกินอยู่ไส พอสิเลี้ยงคนหลายขนาดนี้ให้อิ่มได้”

15:34 แล้วพระเยซูเลยถามเขาว่า “เจ้ามีขนมปังจักก้อน” เขาตอบว่า “มีอยู่เจ็ดก้อน กับปลาน้อยสองสามโต”

15:35 แล้วเพิ่นกะสั่งให้พวกคนหลวงหลายนั่งลงกับพื้นดิน

15:36 แล้วเพิ่นฮับเอาขนมปังเจ็ดก้อนกับปลาฮั้นขึ้นมาขอบพระคุณ พระเจ้า แล้วจั่งบิออกเป็นซิ้นๆ ส่งให้พวกลูกศิษย์ของเพิ่น พวกลูกศิษย์กะเลยแจกให้คนทั้งหลายอยู่ฮั้น

15:37 แล้วพวกเขาได้กินอิ่มเมิ้ดคู่คน แนวกินที่เหลืออยู่ฮั้น เขาเก็บได้เจ็ดกระบุงเต็ม

15:38 แล้วจำนวนคนที่ได้กินฮั้น นอกจากแม่ญิงกับพวกเด็ก มีผู้ซายประมาณสี่พันคน

15:39 แล้วพอเพิ่นได้ส่งคนหลวงหลายพวกฮั้นออกไปแล้ว จั่งลงเฮือมายังฝั่งเขตเมืองมักดาลา