<=(โรม 12 / Romans 12)                  (สารบัญ/TOC)                  (โรม 14 / Romans 14)=>

God's Word For Isan
พระคำของพระเจ้าเพื่อชาวอีสาน
เสียงอีสานใจแจ้ง

  โรม 13 / Romans 13  

13:1 ให้คู่คนยอมอยู่ใต้การเบิ่งแยงของผู้มีอำนาจปกครองบ้านเมืองเด้อ ย้อนว่าบ่มีระบบอำนาจใดๆ เลย ที่บ่ได้มาจากพระเจ้า กับว่า อำนาจของผู้เบิ่งแยงถือฮั้น พระเจ้ากะแต่งตั้งขึ้น

13:2 จั่งซั้น ผู้ใดกะตามที่ขัดขืนต่อต้านอำนาจฮั้นกะขัดขืนต่อต้านระบบบัญชาการที่พระเจ้าแต่งตั้งขึ้น กับผู้ที่ขัดขืนต่อต้านฮั้นกะสินำโทษมาสู่โตเอง

13:3 โดยว่าผู้ปกครองฮั้นกะบ่เป็นตาหย้านดอกสำหรับคนที่เฮ็ดแนวดี แต่ว่าเป็นตาหย้านสำหรับผู้ที่เฮ็ดความซั่วแนวบ่ดี บัดนี้คั่นเจ้าบ่อยากหย้านเจ้านายผู้มีอำนาจฮั้น กะให้เจ้าเฮ็ดแต่แนวดีแนวงามซะเด้อ แล้วเจ้าสิได้ฮับคำซมเซยยกย่องจากเจ้านายฮั้น

13:4 ย้อนว่าผู้ปกครองฮั้นเป็นผู้ปรนนิบัติฮับใซ้ของพระเจ้าเพื่อการดี แต่คั่นเจ้าเฮ็ดการซั่วกะให้หย้านไว้ซะเด้อ ย้อนว่าผู้ปกครองฮั้นบ่ได้ถือดาบไว้เล่นซื่อๆ คือเขาผู้ฮั้นเป็นผู้ฮับใซ้ของพระเจ้า เป็นผู้ที่ลงโทษการซั่วต่อคู่คนที่เฮ็ดแนวซั่ว

13:5 จั่งซั้น พวกเจ้าควรสิเซื่อฟังผู้ปกครองบ้านเมือง บ่แม่นเพื่อการหลีกเลี่ยงโทษแนวเดียว แต่เพื่อความสบายใจ ของการสำนึกผิดซอบของโต

13:6 ย้อนเหตุนี่ล่ะ พวกเจ้าจั่งได้เสียภาษี ย้อนเจ้าหน้าที่ผู้ถืออำนาจฮั้นเป็นผู้ปรนนิบัติฮับใซ้ของพระเจ้า จั่งได้ปฏิบัติหน้าที่นี้อยู่เสมอ

13:7 จั่งซั้น ให้พวกเจ้าตอบสนองคู่ฝ่ายตามที่สมควรได้ฮับเด้อ เสียภาษีตามที่ควรเสีย จ่ายค่าทำเนียมตามที่ควรจ่าย แสดงการยำเกรงให้ผู้ที่ควรแสดง กับให้เกียรติตามที่สมควรต่อผู้ที่ควรฮับ

13:8 อย่าติดหนี้อีหยังต่อผู้ใดเลยเด้อ นอกจากติดหนี้การฮักแพงต่อกันและกัน โดยว่าผู้ที่ฮักแพงผู้อื่นๆ กะได้เฮ็ดอย่างถืกต้องตามกฎบัญญัติแล้ว

13:9 คือจั่งที่กฎบัญญัติกล่าวไว้ว่า “อย่าล่วงประเวณีผัวเมียเขา อย่าฆ่าคน อย่าลักทรัพย์ อย่าเป็นพยานเท็จ อย่าขี้โลภ” ทั้งข้ออื่นๆ นำ กะได้สรุปอยู่ในข้อเดียวนี้คือ “ควรฮักเพื่อนบ้านคือจั่งฮักโตเอง”

13:10 คือความฮักแท้บ่ทำลายเพื่อนบ้าน คั่นเป็นจั่งซั้นแล้ว หมายความว่า ความฮักฮั้น เป็นที่สำเร็จของกฎบัญญัติคู่ข้อ

13:11 แล้วให้เฮ็ดจั่งซั้น โดยฮู้กันไว้ว่า มันเข้าเถิงยามเวลาฮั้นแล้ว ที่เฮาควรสิส่างนอนตื่นโต ย้อนว่าความรอดพ้นของเฮาฮั้นใกล้สิมาฮอดแล้ว แฮงใกล้กว่าที่ได้ฮับเซื่อแต่ตำอิดฮั้น

13:12 คือยามกลางคืนล่วงไปหลายใกล้สิแจ้งแล้ว จั่งซั้น กะให้พวกเฮาปดแนวเฮ็ดฝ่ายความมืดฮั้นออกไป แล้วสวมเครื่องยุทธภัณฑ์ของความสว่างแจ้งไว้

13:13 แล้วขอให้พวกเฮาดำเนินซีวิตให้เหมาะสมกับยามกลางเว็น บ่แม่นเฮ็ดในทางสุ่มสี่สุ่มห้า กินเหล้าเมายา หยาบโลนลามก หรือ วิวาทอิจฉากันฮั้น

13:14 แต่ให้สวมพระเยซูคริสต์เจ้าไว้ แล้วอย่าเปิดซ่องทางไว้บำเรอเนื้อหนังให้มันสนองราคะตัณหาตามความต้องการของมันเด้อ



พระคำของพระเจ้าเพื่อชาวอีสาน
เสียงอีสานใจแจ้ง

God's Word for Isan
Thai-Isan Version

Ron Myers, Translator
Church Planting Missionary and Bible Translator
Isan People and Region of Northeast Thailand

Baptist World Missionary Outreach Ministries
PO Box 3303, Chattanooga, TN 37404

© 2015 God's Word For Isan

ร่วมกันในการแปลโดย อาจารย์พิทักษ์ อุปทุม -o0o- การบรรยายโดย ท่านธนชาต ธนโชติพิพิธ