3:1 ให้เตือนความจำพวกเขาเด้อ ว่า ให้ยอมอยู่ใต้อำนาจของพวกผู้ปกครอง กับเจ้านาย พร้อมที่สิเซื่อฟังเขา กับเฮ็ดการดีคู่แนวอยู่เสมอ

3:2 กับบ่ให้เว้าใส่ร้ายผู้ใดเลย บ่ให้เป็นคนมักทะเลาะวิวาทกัน แต่ให้เป็นคนอ่อนสุภาพ แสดงความนอบน้อมถ่อมโตต่อคนทั้งปวงนำ

3:3 คือ พวกเฮาเองกะเคยเป็นคนโง่ บ่ฮู้จักทีปมาก่อนคือกัน บ่ฮู้จักเซื่อฟังความ เป็นขี้ข้าม้าใซ้ของกิเลสตัณหาต่างๆ ใซ้ซีวิตในทางอิจฉาปองร้าย กัดกันกินกัน เกลียดซังต่อกันและกัน

3:4 แต่ว่า บัดยามความเมตตาปรานี กับความฮักแพงของพระเจ้า คือพระผู้โปรดของคนเฮา ได้มาปรากฏต่อคนทั้งหลาย

3:5 ซึ่งว่า ที่พระเจ้าโปรดให้คนเฮารอดพ้นได้ฮั้น บ่ได้ขึ้นอยู่กับคุณงามความดีที่คนเฮาได้เฮ็ดแต่ประการใดเลย แต่ตามพระกรุณาธิคุณของเพิ่น โดยการซำระให้มีใจบังเกิดใหม่ สร้างขึ้นมาให้เป็นคนใหม่โดยพระวิญญาณ

3:6 ที่เพิ่นได้โปรดทุ่มเทให้อยู่นำพวกเฮาอย่างล้นเหลือ โดยทางพระเยซูคริสต์ พระผู้โปรดของคนเฮา

3:7 ซึ่งบัดนี้ พระเจ้าได้โปรดให้คนเฮาเป็นผู้ซอบธรรมดีพร้อมแล้ว โดยพระกรุณาธิคุณของเพิ่นเอง คนเฮาจั่งเป็นทายาทในการฮับมรดก ตามที่มุ่งหวังฮั่น คือซีวิตนิรันดร์

3:8 นี้กะเป็นถ้อยคำอันสัตย์จริง ซึ่งข้อยปรารถนาอยากให้เจ้าเน้นอย่างบ่อยู่บ่เซา เพื่อคนทั้งหลายที่เซื่อในพระเจ้าฮั้น สิได้อุตส่าห์เฮ็ดการดีคงไว้อยู่เสมอ แนวหมู่นี้กะเป็นการดี เป็นประโยชน์ให้กับคนทั่วไป

3:9 แต่ว่าให้หลีกเลี่ยงคำถามอันบ่เป็นสาระ แนวที่เกิดการโต้เถียงกัน การล่ายไปตามลำดับวงศ์ตระกูลต่างๆ การทะเลาะวิวาทกัน กับการต่อสู้แข่งขันกันในข้อกฎบัญญัติต่างๆ ย้อนว่าแนวหมู่นี้บ่มีประโยชน์ใซ้การบ่ได้เลย

3:10 ส่วนคนใดๆ ที่นอกลู่นอกทางที่เฮ็ดให้แตกแยกกันแนวนี้ กะให้เขาออกไปเลยเด้อ หลังจากตักเตือนเขาเป็นเทื่อแรกกับเทื่อที่สองแล้ว

3:11 โดยฮู้อยู่แล้วว่า คนแนวนี้เป็นคนวิปริตที่ผิดปกติ พวมเฮ็ดอยู่ในทางบาป แล้วประณามโตเขาเองนำ

3:12 บัดพอข้อยใซ้ นายอารเทมาส หรือ นายทีคิกัส มาหาเจ้า กะให้เจ้าตั้งใจไปหาข้อยอยู่เมืองนิโคบุรีเด้อ คือข้อยตัดสินว่าสิพักอยู่ฮั่นตอนยามหนาว

3:13 แล้วให้เจ้าซ่อยส่ง นายเศนาสผู้เป็นทนายความ กับ นายอปอลโล ในการเดินทางของเขาอย่างไวๆ เด้อ ซ่อยเขาเพื่อบ่ให้ขาดอีหยังเลย

3:14 คือ พวกพี่น้องของเฮาควรสิเฮียนฮู้ฝึกกันในการเฮ็ดดีคงไว้อยู่เสมอ เพื่อบัดยามเกิดมีการขัดสนต่างๆ พวกเขากะสิบ่ได้ไร้ผลในการเฮ็ดดี

3:15 สุดท้ายนี้ คู่คนที่อยู่นำข้อยอยู่ทางนี้ ฝากความคึดฮอดมายังเจ้า ซ่อยทักทายพี่น้องที่เซื่อซึ่งฮักแพงพวกเฮาอยู่ทางพู้นให้ข้อยนำ ขอพระกรุณาธิคุณดำรงอยู่กับพวกเจ้าเมิ้ดคู่คนเทอญ อาเมน [ เขียนถึงทิตัส ผู้ได้รับการเจิมให้เป็นผู้ดูแลคนแรกอยู่กลุ่มผู้เชื่อชาวครีต จากเมืองนิโคบุรี แคว้นมาซิโดเนีย ]