13:1 เทื่อนี้สิเป็นเทื่อที่สามที่ข้อยสิมาหาพวกเจ้า “แล้วคำกล่าวหาคู่คำฮั้น ต้องมีคำพยานจากสองสามปาก จั่งสิยืนมั่นเป็นหลักฐานได้”

13:2 คือข้อยได้บอกพวกเจ้าแต่ก่อน กับได้บอกเจ้าอีกเทื่อที่สองฮั้น แล้วในบัดนี้บ่ว่าข้อยบ่ได้อยู่นำ แต่ข้อยกะยังเขียนฝากจดหมายนี้ เรียนเฉพาะผู้ที่เฮ็ดผิดมาก่อนฮั้น พร้อมทั้งผู้อื่นนำ ว่า คั่นข้อยมาอีก ข้อยสิบ่ยกเว้นใผเลย

13:3 เนื่องจากว่า พวกเจ้าต้องการพิสูจน์ว่าพระคริสต์เว้าทางข้อยหนิ ความสามารถของเพิ่นบ่ได้อ่อนต่อพวกเจ้าดอก แต่มีอำนาจหลายอยู่หว่างกลางหมู่พวกเจ้า

13:4 คือ แม้นว่าเพิ่นถืกขึงไว้ตอนอ่อนกำลัง แต่ในบัดนี้เพิ่นดำรงซีวิตอยู่โดยฤทธานุภาพของพระเจ้า แล้วฝ่ายพวกเฮากะยังอ่อนกำลังนำเพิ่น แต่สิได้มีซีวิตดำรงอยู่นำเพิ่นโดยฤทธานุภาพของพระเจ้า กะเพื่อผลประโยชน์ของพวกเจ้า

13:5 ให้พวกเจ้าพิจารณาเบิ่งโตเองเด้อ ว่าพวกเจ้าได้ตั้งอยู่ในความเซื่ออีหลีหรือบ่ ให้พิสูจน์โตเองเด้อ พวกเจ้าบ่ฮู้บ้อว่า พระเยซูคริสต์ได้สถิตอยู่ในพวกเจ้า นอกจากว่าพวกเจ้าบ่ผ่านในการพิสูจน์ฮั้น

13:6 แต่ข้อยเซื่อว่า พวกเจ้าสิฮู้จักดีว่า พวกเฮาได้ผ่านการพิสูจน์ฮั้นแล้ว

13:7 บัดนี้ ข้อยอธิษฐานเว้านำพระเจ้าเพื่อพวกเจ้าสิบ่เฮ็ดแนวซั่วเลย บ่แม่นเพื่อพวกเฮาสิได้เป็นที่ยอมฮับในสายตาพวกเจ้า แต่เพื่อพวกเจ้าสิเฮ็ดแต่แนวถืกแนวแม่น บ่ว่าพวกเฮาอาจสิบ่ได้เป็นที่ยอมฮับต่อพวกเจ้ากะตาม

13:8 คือพวกเฮาบ่สามารถเฮ็ดอีหยังที่ขัดต่อความจริงได้ มีแต่เฮ็ดเพื่อความจริง

13:9 ย้อนว่า บัดยามพวกเฮาอ่อนกำลัง แล้วพวกเจ้าเข้มแข็ง พวกเฮากะยังยินดีนำ คือพวกเฮาอธิษฐานอยากให้พวกเจ้าเป็นผู้ใหญ่ในพระคริสต์อย่างครบบริบูรณ์

13:10 จั่งซั้น ข้อยจั่งเขียนข้อความนี้บัดยามข้อยบ่ได้อยู่นำ คือคั่นว่าข้อยอยู่นำ ข้อยอาจสิเว้าแฮงตามสิทธิ์อำนาจที่พระเจ้าได้มอบหมายไว้ให้ข้อยฮั่น กะเพื่อการเสริมสร้างให้เจริญขึ้น บ่แม่นเพื่อการทำลาย

13:11 สุดท้ายนี้ ขอลาก่อนเด้อ พี่น้องทั้งหลาย เอ้ย ขอให้พวกเจ้าเป็นผู้ใหญ่อย่างครบบริบูรณ์เด้อ ให้ฮับการปลอบโยนใจให้อยู่ดีมีแฮงเด้อ ให้เป็นน้ำหนึ่งใจเดียวกันเด้อ ให้อยู่ฮ่วมกันอย่างสันติภาพเด้อ แล้วขอให้พระเจ้าผู้มีความฮัก มีสันติภาพ สถิตอยู่กับพวกเจ้าเถิด

13:12 ให้ทักทายปราศรัยกันด้วยธรรมเนียมอันดีงามบริสุทธิ์เด้อ

13:13 พี่น้องทั้งหลายของพระเจ้าได้ฝากความคึดฮอดมาหาพวกเจ้านำ

13:14 ขอให้พระกรุณาธิคุณของพระเยซูคริสต์เจ้า ความฮักแพงของพระเจ้าผู้เป็นพ่อ กับความสามัคคีซึ่งมาจากพระวิญญาณบริสุทธิ์ ดำรงอยู่กับพวกเจ้าเถิด อาเมน [ จดหมายฉบับที่สองนี้เขียนยังซาวโครินธ์จากเมืองฟีลิปปี อยู่แคว้นมาซิโดเนีย จั่งส่งไปโดยทิตัสกับลูกา ]